கோவையில் மக்களைத் தேடி மருத்துவம் திட்டத்தில் சிறப்பாக பணியாற்றியவர்களுக்கு ஆட்சியர் பாராட்டு

கோவை: கோவை மாவட்ட ஆட்சியர் அலுவலகத்தில் இன்று (05.08.2024) மக்களைத் தேடி மருத்துவம் திட்டத்தின் நான்காம் ஆண்டு விழா கொண்டாடப்பட்டது. இந்நிகழ்வில், திட்டத்தின் கீழ் சிறப்பாக பணியாற்றிய 11 நபர்களுக்கு மாவட்ட ஆட்சியர் கிராந்திகுமார் பாடி அவர்கள் பாராட்டு சான்றிதழ்களை வழங்கினார்.



இந்த விழா பொது சுகாதார மற்றும் நோய் தடுப்பு மருத்துவத் துறையின் சார்பில் ஏற்பாடு செய்யப்பட்டிருந்தது. சான்றிதழ் பெற்றவர்களில் மருத்துவ அலுவலர்கள், செவிலியர்கள், செயல்முறை சிகிச்சை மற்றும் இயன்முறை சிகிச்சை குழுவினர், மற்றும் பெண் தன்னார்வலர்கள் அடங்குவர்.



இந்நிகழ்வில் மாவட்ட சுகாதார அலுவலர் Dr. அருணா மற்றும் மாவட்ட திட்ட அலுவலர் Dr. சிந்து ஆகியோரும் கலந்து கொண்டனர். மக்களைத் தேடி மருத்துவம் திட்டம் மக்களின் வீடுகளுக்கே சென்று மருத்துவ சேவை வழங்கும் நோக்கத்துடன் செயல்படுத்தப்படுகிறது.



இத்திட்டத்தின் மூலம் பொது மக்களுக்கு எளிதில் மருத்துவ சேவை கிடைப்பதோடு, நோய்களை முன்கூட்டியே கண்டறிந்து சிகிச்சை அளிக்க முடிகிறது. இதன் மூலம் பொது சுகாதாரம் மேம்படுத்தப்படுகிறது. இத்திட்டத்தின் வெற்றிக்கு களப்பணியாளர்களின் அர்ப்பணிப்பு மிகவும் முக்கியமானது என்பதை உணர்ந்தே இந்த பாராட்டு விழா நடத்தப்பட்டதாக ஆட்சியர் தெரிவித்தார்.