பால் மற்றும் பால் பொருட்களில் A1 மற்றும் A2 குறிப்புகளை நீக்க இ-காமர்ஸ் நிறுவனங்களுக்கு FSSAI உத்தரவு

உணவுப் பாதுகாப்பு மற்றும் தரநிர்ணய ஆணையம் (FSSAI) அனைத்து இ-காமர்ஸ் உணவு வணிக நிறுவனங்களுக்கும் (FBOs) பால் மற்றும் நெய், வெண்ணெய், தயிர் போன்ற பால் பொருட்களில் A1 மற்றும் A2 வேறுபாடு குறித்த குறிப்புகளை நீக்குமாறு அறிவுறுத்தியுள்ளது. பல FBO-க்கள் தங்களது FSSAI உரிமம் எண் மற்றும்/அல்லது பதிவுச் சான்றிதழ் எண்ணின் கீழ் A1 & A2 குறிப்புகளைப் பயன்படுத்துவதாக வந்த அறிக்கைகளைத் தொடர்ந்து இந்த உத்தரவு பிறப்பிக்கப்பட்டுள்ளது.

A1 மற்றும் A2 என பாலை வகைப்படுத்துவது பீட்டா கேசின் புரதத்தின் அமைப்பில் உள்ள வேறுபாட்டுடன் தொடர்புடையது என்றும், பால் பொருட்களில் இத்தகைய குறிப்புகளைப் பயன்படுத்துவது தவறாக வழிநடத்தக்கூடியது என்றும், உணவுப் பாதுகாப்பு மற்றும் தரநிர்ணயச் சட்டம், 2006 மற்றும் அதன் விதிமுறைகளுக்கு இணங்காதது என்றும் FSSAI தெளிவுபடுத்தியுள்ளது. உணவுப் பாதுகாப்பு மற்றும் தரநிர்ணய (உணவு தயாரிப்பு தரநிலைகள் மற்றும் உணவு கூடுதல் பொருட்கள்) விதிமுறைகள், 2011-இல் குறிப்பிடப்பட்டுள்ள பாலின் தற்போதைய தரநிலைகள் A1 மற்றும் A2 பால் வகைகளுக்கு இடையே எந்த வேறுபாட்டையும் அங்கீகரிக்கவில்லை.



இந்தக் குறிப்புகளை உடனடியாக தங்கள் தயாரிப்புகளிலிருந்து நீக்குமாறு FBO-க்களுக்கு அறிவுறுத்தப்பட்டுள்ளது. இ-காமர்ஸ் தளங்கள் தங்கள் வலைத்தளங்களில் இருந்து A1 மற்றும் A2 தொடர்பான அனைத்து குறிப்புகளையும் நீக்க வேண்டும். இந்த உத்தரவு பிறப்பிக்கப்பட்ட நாளிலிருந்து கண்டிப்பாக இணங்க வேண்டும் என்று எதிர்பார்க்கப்படுகிறது, இருப்பினும் ஏற்கனவே அச்சிடப்பட்ட லேபிள்களை ஆறு மாதங்களுக்குள் தீர்த்துக்கொள்ள FBO-க்களுக்கு அனுமதி வழங்கப்பட்டுள்ளது. இணக்கத்திற்கு மேலும் நீட்டிப்புகள் வழங்கப்பட மாட்டாது.

FSSAI-இன் தகுதிவாய்ந்த அதிகாரியின் ஒப்புதலுடன் இந்த உத்தரவு பிறப்பிக்கப்பட்டு, அமலாக்கத்திற்காக அனைத்து சம்பந்தப்பட்ட மாநில மற்றும் பிராந்திய உணவுப் பாதுகாப்பு அதிகாரிகளுக்கும் தெரிவிக்கப்பட்டுள்ளது.