உடுமலையில் வழக்கறிஞர் மீது பாஜகவினர் காவல் நிலையத்தில் புகார்

Coimbatore: திருப்பூர் மாவட்டம் உடுமலையில் சில தினங்களுக்கு முன் நடந்த சம்பவம் ஒன்று இன்று பரபரப்பை ஏற்படுத்தியுள்ளது. பெரியாரின் பிறந்தநாளை முன்னிட்டு முற்போக்கு வழக்கறிஞர் அமைப்பின் சார்பில் வைக்கப்பட்டுள்ள பிளக்ஸ் பேனரில் மத்திய அமைச்சர் நிர்மலா சீதாராமனின் பெயரை களங்கப்படுத்தும் விதமாக உள்ளதாக கூறப்படுகிறது.

இதனை கண்டித்து, பாரதிய ஜனதா கட்சியின் மாவட்ட தலைவர் மங்களம் ரவியின் அறிவுறுத்தலின் பேரில், வழக்கறிஞர் சாதிக்பாட்சா மீது நடவடிக்கை எடுக்க கோரி இன்று உடுமலை காவல் நிலையத்தில் புகார் அளிக்கப்பட்டது.



பாஜக நிர்வாகிகள் காவல் நிலையத்தில் அளித்த புகாரில், "வழக்கறிஞர் சாதிக்பாட்சா மீது உரிய நடவடிக்கை எடுக்கப்படவில்லை என்றால், பாஜகவினர் ஒன்று திரண்டு போராட்டத்தில் ஈடுபடுவோம்" என்று தெரிவித்தனர்.

இந்த புகார் அளிக்கும் நிகழ்வில் பாஜகவின் மாவட்ட பொதுச் செயலாளர் வடுகநாதன், மாவட்ட செயலாளர் திருமதி கலா, மகளிரணி மாவட்ட பொதுச் செயலாளர் ராதிகா, மாவட்ட இளைஞரணி செயலாளர் பாலகுரு ஆகியோர் கலந்து கொண்டனர்.



மேலும், மண்டல தலைவர்களான மாரியப்பன், நாகமாணிக்கம், சுப்ரமணியம், யுவன் மணி, கண்ணாயிரம் உள்ளிட்ட பல்வேறு நிர்வாகிகளும் இந்த புகார் அளிக்கும் நிகழ்வில் பங்கேற்றனர்.



இந்த சம்பவம் உடுமலை பகுதியில் பெரும் பரபரப்பை ஏற்படுத்தியுள்ளது. காவல்துறையினர் இந்த புகாரின் மீது என்ன நடவடிக்கை எடுப்பார்கள் என்பதை பொதுமக்கள் ஆர்வத்துடன் எதிர்பார்த்துக் கொண்டிருக்கின்றனர்.