ஒரு ரூபாய்க்கு இன்று நூறு வயசு

நூறு, ஐநூறு ரூபாய் நோட்டுகளின் முதல்வனான ஒரு ரூபாய் நோட்டு உருவாகி, இன்றுடன் நூறு ஆண்டுகள் நிறைவடைகிறது.

ஒத்த ரூபா நோட்டு என்று சற்றே மலிவாக அழைக்கப்பட்டாலும், பிற ரூபாய் நோட்டுகள் உருவாக, இந்த ஒரு ரூபாய் நோட்டுதான் முன்னோடியாக இருந்திருக்கிறது. கடந்த, 1917 ம் ஆண்டு நவம்பர் 30 ம் தேதி, முதல் ஒரு ரூபாய் நோட்டு அறிமுகம் செய்யப்பட்டது. அப்போதைய வர்த்தகர்கள், பண பரிவர்த்தனை செய்ய, இந்த ஒரு ரூபாய் நோட்டு பெரிதும் உதவிகரமாக இருந்துள்ளது. கோவையில் சாய்பாபாகாலனி பகுதியில் வசித்து வரும் பழங்கால நாணய சேகரிப்பாளர் ஜெயேஷ்குமார் இந்த பழைய ரூபாய் நோட்டுகளை, பத்திரமாக பராமரித்து வருகிறார். மேலும் ஜெயேஷ்குமார் பழங்கால ரூபாய் நோட்டுகளை சேகரிப்பதை ஒரு பொழுதுபோக்காக கொண்டு உள்ளார். முதல் ஒரு ரூபாய் நோட்டின் இருபுறமும், ஐந்தாம் ஜார்ஜ் மன்னரின் படம் அச்சிடப்பட்டிருந்தது.

1935 ஏப்ரல் 1ல் ரூபாய் நோட்டு அச்சிடும் உரிமம், இந்திய ரிசர்வ் வங்கிக்கு வழங்கப்பட்டது. அதன் பின் அச்சிடப்பட்ட, முதல் ஒரு ரூபாய் நோட்டில், முதலில் எட்டு மொழிகள் மட்டுமே பயன்படுத்தப்பட்டன. 1940ல் அச்சிடப்பட்ட நோட்டில், ஆறாவது ஜார்ஜின் உருவப்படம் அச்சிடப்பட்டது. நாடு சுதந்திரம் பெற்ற பின், பதவியேற்ற நிதியமைச்சரின் மேற்பார்வையில் அச்சிடப்பட்ட ஒரு ரூபாய் நோட்டு, மகிழ்ச்சியில் திளைத்திருந்த மக்களின் பெரும் வரவேற்பை பெற்றது. 1949ல் நிதித்துறை செயலர் கே.ஆர்.கே.மேனன் கையெழுத்திட்ட நோட்டில், முதல் முதலாக அசோக ஸ்தூபி இடம் பெற்றது.

1951ல் இந்தியில் அச்சிடப்பட்ட ஒரு ரூபாய் வெளியானது. அதன் பின், 1994ம் ஆண்டு நிறுத்தப்பட்ட, ஒரு ரூபாய் நோட்டு, 2015 மார்ச் 6ல் மறுபடியும் அறிமுகம் செய்யப்பட்டது. ஒரு ரூபாய் நோட்டு அச்சிட, 1 ரூபாய் 14 காசுகள் செலவாவதாக, தகவல் அறியும் உரிமைச்சட்டத்தில் தெரியவந்துள்ளது.

கடந்த, 1943ல் ஒரு சவரன் தங்கத்தின் விலை, 13 ரூபாய் ஆக இருந்தது. அதன்படி எடுத்துக் கொண்டால், இன்று அந்த ஒரு ரூபாய் நோட்டு, 15 ஆயிரம் ரூபாய் மதிப்புள்ளது. தற்போது அரசால் செல்லாததாக அறிவிக்கப்பட்டுள்ள, 500, 1000 ரூபாய் நோட்டுகளை விட, இந்த ஒரு ரூபாய் நோட்டின் மதிப்பு, அதிகம் என்பதுதான் வினோதம்.

மொத்தமாக 69 வகையிலான ஒரு ரூபாய் நோட்டுக்கள் வெளியிடப்பட்டுள்ளதாக கூறும் ஜெயேஷ்குமார், போர்த்துகீசிய அரசால் வெளியிடப்பட்ட ரூபாய் நோட்டை தவிர பிற நோட்டுக்கள் அனைத்திலும் தமிழ் மொழி இடம்பெற்றிருந்தது தமிழர்கள் பெருமைப்பட வேண்டிய தருணம் எனவும் நினைவுகூர்கிறார்.