கோவை மாவட்ட ஆட்சியர் அலுவலகத்தில் அங்கீகரிக்கப்பட்ட அரசியல் கட்சிகளின் உறுப்பினர்கள் முன்னிலையில் கோவை மாவட்டத்தில் உள்ள 10 சட்டமன்ற தொகுதிகளுக்கான திருத்தம் செய்யப்பட்ட இறுதி வாக்காளர் பட்டியலை மாவட்ட ஆட்சியர் ஹரிஹரன் இன்று வெளியிட்டார்.
இந்த பட்டியலின் படி கோவை மாவட்டத்தில் உள்ள மேட்டுப்பாளையம், சூலூர், கவுண்டம்பாளையம், கோவை தெற்கு, தொண்டாமுத்தூர், கோவை வடக்கு, சிங்காநல்லூர், கிணத்துக்கடவு, பொள்ளாச்சி, வால்பாறை என பத்து தொகுதிகளில் 28 லட்சத்து 35 ஆயிரத்து 102 வாக்காளர்கள் பட்டியலில் இணைக்கப்பட்டுள்ளனர். இதில் ஆண் வாக்காளர்கள் 14 லட்சத்து 06 ஆயிரத்து 824 பேரும், பெண் வாக்காளர்கள் 14 லட்சத்து 28 ஆயிரத்து 2 பேரும், மூன்றாம் பாலினத்தவர் 276 பேரும் உள்ளனர்.
கடந்த செப்டம்பர் மாதம் வெளியிடப்பட்ட வரைவு வாக்காளர் பட்டியலில் இருந்து வீடு மாறியவர்கள், உயிரிழந்தவர்கள், பல முறை பதிவு செய்தவர்கள் என 91 ஆயிரத்து 54 பேர் பட்டியலில் இருந்து நீக்கப்பட்டுள்ளனர். இதையடுத்து அங்கீகரிக்கப்பட்ட கட்சிகளை சேர்ந்த பிரதிநிதிகளுக்கு வாக்காளர் பட்டியலின் நகல் வழங்கப்பட்டது.