வரசித்தி விநாயகருக்கு வெள்ளி கவசம் - ரூ.10 லட்சம் நோட்டுகளால் அலங்காரம்

Coimbatore: விநாயகர் சதுர்த்தி விழா இன்று நாடு முழுவதும் கோலாகலமாக கொண்டாடப்பட்டு வருகிறது. தமிழகத்தில் விநாயகரின் பிரம்மாண்ட சிலைகளை வைத்தும், அன்னதானம், ஊர்வலம் நடத்தியும் விமர்சையாக கொண்டாடப்பட்டு வருகிறது.

இந்நிலையில், கோவை நரசிம்மநாயக்கன்பாளையம் அருள்மிகு வரசித்தி விநாயகர் ஆலயத்தில் விநாயக பெருமானுக்கு வெள்ளி கவசம் அணிவித்து சிறப்பு வழிபாடு நடத்தப்பட்டது. கோவில் கருவறை முழுவதும் ₹10, ₹20, ₹50, ₹100, ₹200 மற்றும் ₹500 ரூபாய் நோட்டுகள் ஆகிய மொத்தம் ₹10 லட்சம் மதிப்புள்ள நோட்டுகளைக் கொண்டு அலங்காரம் செய்யப்பட்டது.

இந்த சிறப்பு அலங்காரத்தை தரிசனம் செய்ய சுற்றுப் பகுதிகளில் இருந்து திரளான பக்தர்கள் கோவிலுக்கு வந்து தரிசனம் செய்து சென்றனர். கோவிலில் கைலாய வாத்தியங்கள் இசைக்கப்பட்டு சிறப்பு பூஜைகள் நடைபெற்றன.

மேலும், விழாவையொட்டி பொதுமக்களுக்கு அன்னதானம் வழங்கப்பட்டது. இந்த சிறப்பு விழாவுக்கான ஏற்பாடுகளை நரசிம்மநாயக்கன்பாளையம் அருள்மிகு வரசித்தி விநாயகர் கோயில் கமிட்டியினர் மற்றும் ஊர் பொதுமக்கள் இணைந்து செய்திருந்தனர்.

விநாயகர் சதுர்த்தி விழா முழுவதும் கோவிலில் சிறப்பு வழிபாடுகள் நடைபெறும் என கோவில் நிர்வாகம் தெரிவித்துள்ளது.