கோடை சுற்றுலா: லேம்ப்ஸ் ராக் பகுதியின் சிறப்புகள்

நீலகிரி: கோடைக்காலம் தொடங்கி விட்டதால், சமவெளி பகுதிகளில் நிலவும் வெப்பத்தை சமாளிக்க சுற்றுலாப் பயணிகள் குளிர்ச்சியான பகுதிகளுக்கு படையெடுக்கத் துவங்கியுள்ளனர். மேலும், ஆண்டு முழுவதும் உழைத்து களைத்த மக்கள், கோடை விடுமுறையைக் குடும்பத்துடன் கழிக்க மலை பிரதேசங்களுக்கும், குளிர் பிரதேசங்களுக்கும் செல்ல ஆயத்தமாகி வருகின்றனர். குறிப்பாக, சுற்றுலா என்றாலே நம்ம ஊர் மக்கள் வண்டியைக் கிளப்பி உதகைக்குப் புறப்பட்டு விடுவார்கள்.

சரி..! அப்படி, உதகைக்கு செல்பவர்கள் எந்தெந்தப் பகுதிகளுக்கு செல்லலாம். அந்தப் பகுதியின் சிறப்புகள் என்ன..? என்பதை விளக்குவதற்காகத் தான் இந்த வாராந்திர கட்டுரை.

நீலகிரி மாவட்டம் உதகைக்கு அடுத்தபடியாக இருக்கும் குன்னூரில் பிரசித்தி பெற்ற சுற்றுலா ஸ்தலமாக விளங்குவது லேம்ப்ஸ் ராக் காட்சிமுனையாகும். இது குன்னூர் பேருந்து நிலையத்திலிருந்து 8 கி.மீ. தொலைவில் அமைந்துள்ளது. இந்தப் பகுதியிலிருந்து பார்த்தால் காரமடை, மேட்டுப்பாளையம், கோவை போன்ற பகுதிகளின் பறவை பார்வை காட்சிகள் தெரியும். வனத்துறை கட்டுப்பாட்டில் உள்ள இந்தக் காட்சிமுனை பகுதிக்கு செல்ல பொதுவான கட்டணமாக ரூ 7-ம், கேமிரா பயன்பாட்டிற்கு ரூ. 20-ம் கட்டணமாக வசூலிக்கப்படுகிறது. மேலும், கார்,வேன், பேருந்து போன்ற வாகனங்களுக்கு பார்க்கிங் கட்டணமாக ரூ. 10 வசூலிக்கப்படுகிறது. லாம்ஸ்ராக் காட்சிமுனை பகுதிக்கு செல்லத் தனியாக பேருந்து வசதி கிடையாது. ஆடர்லி செல்லும் பேருந்தில் தான் செல்ல வேண்டும்.



அதேபோல, இந்த சாலை மார்க்கமாக குன்னூர் பேருந்து நிலையத்திலிருந்து 12 கி.மீ., தொலைவில் மேலும் ஒரு காட்சிமுனை அமைந்துள்ளது டால்பின் மூக்கு போன்று இந்தக் காட்சிமுனையின் பாறைகள் அமைந்துள்ளதால், இதற்கு டால்பினோஸ் காட்சி முனை எனப் பெயரிடப்பட்டுள்ளது. இந்தக் காட்சிமுனைக்கு செல்லவேண்டுமானால், குன்னூர் பேருந்து நிலையத்திலிருந்து ஆடர்லி பேருந்தில் தான் பயணம் செய்ய வேண்டும். வாகனங்களில் சென்றால் எளிதில் சென்று வரலாம். பார்க்கிங் கட்டணமாக ரூ. 10 வசூலிக்கப்படுகிறது.