"கொஞ்சமாச்சும் உண்மையைப் பேசுங்கள்" - முதல்வர் ஸ்டாலினுக்கு வானதி சீனிவாசன் வேண்டுகோள்

Coimbatore: கோவை தெற்கு சட்டமன்ற உறுப்பினர் வானதி சீனிவாசன் தனது முகநூல் பக்கத்தில் முதல்வர் ஸ்டாலினை விமர்சித்து பதிவிட்டுள்ளார். அதில், ஒரு மாநிலத்தின் முதல்வராக ஆட்சிப் பொறுப்பில் இருக்கும் ஸ்டாலினின் பேச்சுகளில் உண்மைத்தன்மை கலந்திருக்க வேண்டும் என்று குறிப்பிட்டுள்ளார்.

"மத்திய அரசு நம்மை வஞ்சித்துவிட்டது, மத்திய அரசு நமக்கு நிதி ஒதுக்கவில்லை, ஏன் நமது பெயரைக் கூட உச்சரிக்கவில்லை" என்று ஆதாரமின்றி பேசுவது ஒரு மாநில முதல்வருக்கு அழகல்ல என்று வானதி சீனிவாசன் தெரிவித்துள்ளார். ஒரு மாநிலத்தின் பெயரைக் குறிப்பிடவில்லை என்றால், அம்மாநிலத்தை ஒதுக்கிவிட்டதாக அர்த்தமாகாது என்றும் அவர் கூறியுள்ளார்.

கடந்த 10 ஆண்டுகால தேசிய ஜனநாயகக் கூட்டணி ஆட்சியில், எண்ணற்ற நலத்திட்டங்களால் தமிழகம் மிகுந்த பயனடைந்துள்ளதாக வானதி சீனிவாசன் குறிப்பிட்டுள்ளார். முத்ரா கடனுதவி, மருத்துவக் கல்லூரிகள், விவசாயிகள் கௌரவிப்பு நிதி, பிரதமரின் வீடு வழங்கும் திட்டம், இலவச எரிவாயு திட்டம், உடான் திட்டம், வந்தே பாரத் இரயில்கள் போன்ற பல்வேறு திட்டங்களை பட்டியலிட்டுள்ளார்.

இறுதியாக, பொய் பரப்புரைகளை பரப்புவதை விட்டுவிட்டு, தமிழகத்தை முன்னேற்றப் பாதையில் அழைத்துச் செல்வதில் கவனம் செலுத்துமாறு முதல்வர் ஸ்டாலினுக்கு வானதி சீனிவாசன் வேண்டுகோள் விடுத்துள்ளார்.