காரமடை ரயில் நிலைய விரிவாக்கப் பணிக்காக தோலம்பாளையம் ரயில்வே கேட் காலவரையின்றி மூடல்

Coimbatore: காரமடை ரயில் நிலைய விரிவாக்க பணிகள் மற்றும் புதிய பிளாட்பாரம் கட்டுமான பணிகள் காரணமாக காரமடை - தோலம்பாளையம் இடையேயான ரயில்வே கேட் இன்று (மே 06) காலை முதல் காலவரையின்றி மூடப்பட்டுள்ளது என தெற்கு ரயில்வே சேலம் கோட்ட நிர்வாகம் அறிவித்துள்ளது.






காரமடை ரயில் நிலையத்தில் மேற்கொள்ளப்படும் விரிவாக்க பணிகளின் ஒரு பகுதியாக புதிய பிளாட்பாரம் கட்டுதல் உள்ளிட்ட பல்வேறு அபிவிருத்தி பணிகள் தீவிரமாக நடைபெற்று வருகின்றன. இந்நிலையில், இப்பணிகளை விரைவாக முடிப்பதற்காக காரமடை - தோலம்பாளையம் இடையேயான ரயில்வே கேட்டை காலவரையின்றி மூட தெற்கு ரயில்வே நிர்வாகம் முடிவு செய்துள்ளது.




இதனால், தோலம்பாளையம் பகுதியிலிருந்து காரமடை செல்லும் பொதுமக்கள் மற்றும் வாகன ஓட்டிகள் புதிதாக கட்டப்பட்டுள்ள மேம்பாலம் வழியாக செல்ல வேண்டும் என ரயில்வே நிர்வாகம் அறிவுறுத்தியுள்ளது. அதேபோல், மாற்று வழிகளையும் பயன்படுத்திக் கொள்ளலாம் என தெரிவிக்கப்பட்டுள்ளது.




காரமடை ரயில் நிலைய விரிவாக்க பணிகள் முடிவடையும் வரை இந்த ரயில்வே கேட் மூடப்பட்டே இருக்கும் என எதிர்பார்க்கப்படுகிறது. இதனால், அப்பகுதி மக்கள் தற்காலிகமாக சிறிது அசெளகரியத்தை சந்திக்க நேரிடும் என்றாலும், விரிவாக்க பணிகள் முடிந்த பின் சிறந்த ரயில்வே வசதிகளை பெற முடியும் என ரயில்வே அதிகாரிகள் தெரிவித்துள்ளனர்.