திருப்பூரில் 100 நாள் வேலைவாய்ப்பு திட்ட ஒழிப்புக்கு எதிராக மாற்றுத்திறனாளிகள் போராட்டம்

திருப்பூர்: மகாத்மா காந்தி தேசிய ஊரக வேலைவாய்ப்பு திட்டத்தின் பெயரை மாற்றி அந்த திட்டத்தையே ஒழிக்க முயற்சிக்கும் மத்திய அரசுக்கு எதிராக திருப்பூரில் மாற்றுத்திறனாளிகள் போராட்டத்தில் ஈடுபட்டனர். இதில் 59 மாற்றுத்திறனாளிகள் போலீசாரால் கைது செய்யப்பட்டனர்.



மகாத்மா காந்தி தேசிய ஊரக வேலைவாய்ப்பு திட்டம் என்னும் பெயரை விபி.ஜி ராம்ஜி என மாற்றி 100 நாள் வேலை திட்டத்தையே ஒழிக்க திட்டமிடும் மத்திய மோடி அரசை கண்டித்து தமிழ்நாடு அனைத்து வகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கம் சார்பில் திருப்பூரில் போராட்டம் நடத்தப்பட்டது.

திருப்பூர் குமரன் நினைவகம் முன்பு நடைபெற்ற ஆர்ப்பாட்டத்தில் 59க்கும் மேற்பட்ட மாற்றுத்திறனாளிகள் கலந்து கொண்டனர். இவர்கள் சாலை மறியல் போராட்டத்தில் ஈடுபட முயன்ற போது அவர்களை போலீசார் தடுத்து நிறுத்தினர்.

போராட்டக்காரர்கள் மத்திய அரசின் முடிவை கண்டனம் செய்து கோஷங்கள் எழுப்பினர். கிராமப்புற ஏழை மக்களுக்கு வாழ்வாதாரமாக இருக்கும் 100 நாள் வேலை திட்டத்தை ஒழிக்க முயற்சிப்பது தவறு என்று போராட்டக்காரர்கள் தெரிவித்தனர்.

இந்நிலையில், சாலை மறியலில் ஈடுபட முயன்ற 59 மாற்றுத்திறனாளிகளை போலீசார் கைது செய்து அருகில் உள்ள திருமண மண்டபத்திற்கு அழைத்துச் சென்றனர். பின்னர் அவர்கள் விடுவிக்கப்பட்டனர்.