அமெரிக்காவில் ஸ்ரீ ராமகிருஷ்ணா கல்வி நிறுவனங்களின் முன்னாள் மாணவர்கள் சங்க புதிய கிளை தொடக்கம்

Coimbatore: கோவை ஆவாரம்பாளையத்தில் உள்ள எஸ்.என்.ஆர்.சன்ஸ் அறக்கட்டளையின் கீழ் செயல்பட்டு வரும் ஸ்ரீ ராமகிருஷ்ணா கல்வி நிறுவனங்களின் முன்னாள் மாணவர்கள் சங்கத்தின் புதிய கிளை அமெரிக்காவில் தொடங்கப்பட்டுள்ளது.

இந்த கிளை தொடக்க விழா அமெரிக்காவின் டெக்சாஸ் மாகாணத்தில் உள்ள தி ராஞ்ச் ஆஃப் லோன்சம் டவ் (The Ranch of Lonesome Dove, Texas) அரங்கில் 24.10.2026 (சனிக்கிழமை) அன்று நடைபெற்றது.

நிர்வாக விழாவிற்கு, எஸ்.என்.ஆர்.சன்ஸ் அறக்கட்டளையின் அறங்காவலர் டாக்டர் சுந்தர் ராமகிருஷ்ணன் தலைமை வகித்தார். ஸ்ரீ ராமகிருஷ்ணா கலை அறிவியல் கல்லூரியின் முதல்வர் மற்றும் செயலர் முனைவர் பி.எல்.சிவக்குமார் மற்றும் ஸ்ரீ ராமகிருஷ்ணா பொறியியல் கல்லூரியின் முதல்வர் முனைவர் ஏ.சௌந்தர்ராஜன் ஆகியோர் முன்னிலை வகித்தனர்.

அமெரிக்கா மற்றும் கனடாவில் வசித்து வரும் முன்னாள் மாணவர்கள் ஒன்றிணைந்து தங்களது கல்லூரி கால நினைவுகளைப் பகிர்ந்து கொள்ளவும், ஒருவருக்கொருவர் தொழில்முறைத் தொடர்புகளை வளர்த்துக் கொள்ளவும், ஸ்ரீ ராமகிருஷ்ணா கல்வி நிறுவனங்களுடனான தங்களது உறவை மேலும் வலுப்படுத்திக் கொள்ளவும் வாய்ப்பளிக்கும் வகையில் இச்சந்திப்பு அமைந்திருந்தது.

இந்நிகழ்வில், ஸ்ரீ ராமகிருஷ்ணா பொறியியல் கல்லூரி, தொழில்நுட்பக் கல்லூரி, ஸ்ரீ ராமகிருஷ்ணா கலை அறிவியல் கல்லூரி, மகளிர் கலை அறிவியல் கல்லூரி, பல் மருத்துவக் கல்லூரி, இன்ஸ்டிடியூட் ஆஃப் பாரா மெடிக்கல் சயின்ஸ் ஆகிய கல்வி நிறுவனங்களின் முன்னாள் மாணவர்கள் பங்கேற்று சிறப்பித்தனர்.

"ஒரே எஸ்.என்.ஆர். குடும்பம், உலகளாவிய ஒரே சமூகம்" என்ற உணர்வை மையமாகக் கொண்டு அமைந்த இச்சந்திப்பு, ஸ்ரீ ராமகிருஷ்ணா கல்வி நிறுவனங்களின் உலகளாவிய முன்னாள் மாணவர்கள் வலையமைப்பை வலுப்படுத்தும் முயற்சியாக அமைந்தது என்பது குறிப்பிடத்தக்கது.