கோவை ஈ.ஏ.எஸ்.ஏ. பொறியியல் கல்லூரி – மலேசியா இண்டி சர்வதேசப் பல்கலைக்கழகம் இடையே புரிந்துணர்வு ஒப்பந்தம்

Coimbatore: கோவை நவக்கரையில் உள்ள ஈ.ஏ.எஸ்.ஏ., பொறியியல் மற்றும் தொழில்நுட்பக் கல்லூரி, மலேசியா நாட்டில் உள்ள இண்டி சர்வதேசப் பல்கலைக்கழகத்துடன் புரிந்துணர்வு ஒப்பந்தம் ஏற்படுத்திக் கொண்டது.

28.10.2026 அன்று இணையவழியில் நடைபெற்ற இந்நிகழ்ச்சியில், ஈ.ஏ.எஸ்.ஏ., பொறியியல் மற்றும் தொழில்நுட்பக் கல்லூரி தாளாளர் டி.ஈ. ஆதர்ஷ், முதல்வர் இசட். ராபர்ட் கென்னடி, இண்டி சர்வதேசப் பல்கலைக்கழக இணைவேந்தர் கோ காங் வென், சர்வதேச தொடர்பு மைய இயக்குநர் முனைவர் அசோகன் வாசுதேசன் ஆகியோர் கையொப்பமிட்டு புரிந்துணர்வு ஒப்பந்தத்தை முடிவு செய்தனர்.

இந்த ஒப்பந்தத்தின் மூலம், இரு கல்வி நிறுவனங்களுக்கு இடையே கல்விசார் ஒத்துழைப்புக்கான பொதுவான கட்டமைப்பு உருவாக்கப்பட உள்ளது. இதற்கான ஒவ்வொரு நடவடிக்கையும் இரு கல்வி நிறுவன அதிகாரிகளிடமிருந்து எழுத்துப்பூர்வ ஒப்புதல் பெற்ற பின்னரே மேற்கொள்ளப்படும்.

மாணவர் மற்றும் ஆசிரியர் பரிமாற்றம் செய்து கொள்ள திட்டம் வகுக்கப்படும். வருகை தரு கல்வியாளர்கள் மற்றும் ஆய்வாளர்களுக்கான திட்டங்கள் தீட்டப்படும். இரு கல்வி நிறுவன கல்வித் திட்டங்களில் ஒத்துழைப்பு அளிக்கப்படும்.

கூட்டாகக் கல்வித் திட்டங்கள் வகுக்கப்படும். கூட்டு ஆராய்ச்சியின் மூலம் ஆராய்ச்சிக் கட்டுரைகள் வெளியிடப்படும். இரு தரப்பினரும் கல்வி உபகரணங்கள் மற்றும் தகவல்களைப் பரிமாறிக்கொள்ளலாம். கூட்டு மையங்கள், ஆய்வகங்கள் அல்லது சிறப்பு மையங்களை நிறுவுவதற்கும் பரிசீலிக்கப்படும்.

கூட்டு பாடநெறிகள், கருத்தரங்குகள் மற்றும் பயிற்சித் திட்டங்கள், மாநாடுகள் மற்றும் கல்விசார் கலந்துரையாடல்கள், தொழிற்பயிற்சிக்கான திட்டங்களும் வகுக்கப்படும்.

ஈ.ஏ.எஸ்.ஏ., பொறியியல் மற்றும் தொழில்நுட்பக் கல்லூரி தலைவர் டி.ஈ. சுஜாதா, செயலாளர் டி.ஈ. அஜித் ஆகியோரின் வழிகாட்டுதலுடன் நடைபெற்ற இந்நிகழ்ச்சிக்கான ஏற்பாடுகளை, கல்லூரியின் சர்வதேச தொடர்புகள் மற்றும் முன்னாள் மாணவர்கள் சங்க இயக்குநர் முனைவர் வி.எத்தினா செய்திருந்தார். இந்நிகழ்ச்சியில் துறைத்தலைவர்கள் கலந்து கொண்டனர்.