Coimbatore: கோவை மாநகராட்சி பிரதான அலுவலகத்தில் நடைபெற்ற மக்கள் குறைதீர்க்கும் நாள் கூட்டத்தில், மேயர் ரங்கநாயகி ராமச்சந்திரன் மற்றும் மாநகராட்சி ஆணையாளர் கட்டா ரவி தேஜா முன்னிலையில் பொதுமக்களிடமிருந்து 63 கோரிக்கை மனுக்கள் பெறப்பட்டன.
இந்த கூட்டம் இன்று (06.10.2026) கோயம்புத்தூர் மாநகராட்சி பிரதான அலுவலகத்தில் நடைபெற்றது. மேயர் ரங்கநாயகி ராமச்சந்திரன் தலைமையிலும், மாநகராட்சி ஆணையாளர் கட்டா ரவி தேஜா முன்னிலையிலும் இந்த கூட்டம் நடத்தப்பட்டது.
இக்கூட்டத்தில் பொதுமக்களிடமிருந்து, பிறப்பு, இறப்பு சான்றிதழ்கள், சாலை வசதி, மின்விளக்குகள், குடிநீர் வசதி, பாதாள சாக்கடை, புதிய குடிநீர் இணைப்பு பெயர் மாற்றம், ஆக்கிரமிப்பு அகற்றுதல் உள்ளிட்ட பல்வேறு கோரிக்கைகள் அடங்கிய 63 மனுக்கள் பெறப்பட்டன. இந்த மனுக்கள் மீது சம்மந்தப்பட்ட அலுவலர்கள் உடனடியாக நடவடிக்கை மேற்கொள்ள வேண்டும் என மேயர் ரங்கநாயகி அறிவுறுத்தினார்.
அதனைத் தொடர்ந்து, மாநகராட்சி ஆணையாளர் முன்னிலையில், தீபாவளி பண்டிகையை முன்னிட்டு, மாநகராட்சியின் ஐந்து மண்டலங்களில் பணிபுரியும் நிரந்தர தூய்மைப் பணியாளர்களுக்கான சீருடைகள், காலணி மற்றும் மழை கோட் ஆகியவற்றின் மாதிரிகள் காட்சிபடுத்தப்பட்டு, தூய்மைப் பணியாளர்கள் தேர்வு செய்யும் பணிகளை மேயர் ரங்கநாயகி நேரில் பார்வையிட்டார்.
இக்கூட்டத்தில், துணை மேயர் ரா.வெற்றிசெல்வன், துணை ஆணையாளர் த.குமரேசன், மாநகர தலைமைப் பொறியாளர் விஜயகுமார், நகர் நல அலுவலர் சுபாஷ் காந்தி, மாநகர கல்வி அலுவலர் குணசேகரன் (பொ), உதவி ஆணையர்கள் பிரகாஷ் (நிர்வாகம்), தட்சிணாமூர்த்தி (கிழக்கு), மோகனசுந்தரி (வடக்கு), முத்துக்குமார் (தெற்கு), செயற்பொறியாளர்கள், உதவி செயற்பொறியாளர்கள், மண்டல சுகாதார அலுவலர்கள், உதவி பொறியாளர்கள், சுகாதார ஆய்வாளர்கள், மாநகராட்சி அனைத்து அலுவலர்கள் உட்பட பலர் கலந்து கொண்டனர்.
