கோவை தெற்கு மண்டலத்தில் தேங்கிய மழைநீரை அகற்றும் பணிகளை மேயர் ஆய்வு

Coimbatore: வடகிழக்கு பருவமழையையொட்டி, கோயம்புத்தூர் மாநகராட்சி தெற்கு மண்டலத்திற்கு உட்பட்ட பகுதிகளில் மேயர் க.ரங்கநாயகி ராமச்சந்திரன் நேரில் பார்வையிட்டு, சாலையில் தேங்கியுள்ள மழைநீரை அகற்ற சம்மந்தப்பட்ட அலுவலர்களுக்கு அறிவுறுத்தினார். அப்பகுதிகளிலுள்ள பொதுமக்களிடம் குறைகளையும் கேட்டறிந்தார்.

இந்த ஆய்வு அக்டோபர் 23, 2026 அன்று நடைபெற்றது. தெற்கு மண்டலம் வார்டு எண்.76-க்குட்பட்ட செல்வபுரம், பாரதியார் சாலையில் உள்ள மழைநீர் வடிகால் தூர்வாரும் பணிகளை மேற்கொள்ளவும், வார்டு எண்.79-க்குட்பட்ட செல்வபுரம் எல்.ஐ.சி.காலனி மற்றும் வார்டு எண்.78-க்குட்பட்ட செல்வபுரம், 60அடி சாலையில் உள்ள வடக்கு ஹவுசிங் யூனிட், வார்டு எண் 94-க்கு உட்பட்ட மாச்சம்பாளையம் ஸ்ரீ ரங்கா அவன்யூ, வார்டு எண் 89-க்கு உட்பட்ட இராமசெட்டிபாளையம் ஆகிய பகுதிகளில், சாலையோரங்களில் தேங்கியுள்ள மழைநீரை அகற்றி, தூய்மைப்பணிகளை மேற்கொள்ள மேயர் சம்மந்தப்பட்ட அலுவலர்களுக்கு அறிவுறுத்தினார்.

அதனைத் தொடர்ந்து, வார்டு எண் 92-க்கு உட்பட்ட கோவைப்புதூர் பிரிவு, இ.பி காலனி பகுதியில் நடைபெற்று வரும் பாதாள சாக்கடை சுத்தம் செய்யும் பணிகளை நேரில் பார்வையிட்டு, பணிகளை விரைவாக மேற்கொள்ள சம்மந்தப்பட்ட அலுவலர்களுக்கு மேயர் அறிவுறுத்தினார்.

இந்த ஆய்வுகளின்போது, துணை மேயர் ஆர் வெற்றிசெல்வன், தெற்கு மண்டல தலைவர் ரெ.தனலட்சுமி, உதவி ஆணையர் முத்துசாமி, செயற்பொறியாளர் ஜாக்குலின் ஜாய் லதா, உதவி செயற்பொறியாளர் கனகராஜ், மாமன்ற உறுப்பினர்கள் ராஜ்குமார், வசந்தாமணி, சிவசக்தி, முருகேசன், உதவி பொறியாளர்கள் ஏஞ்சலினா, நவநீதகிருஷ்ணன், ரவீனா, சுகாதார ஆய்வாளர் தனபாலன் மற்றும் மாநகராட்சி அலுவலர்கள் உட்பட பலர் உடனிருந்தனர்.