வெள்ளலூர் உரக்கிடங்கில் பயோ-CNG ஆலை பணிகளை ஆய்வு செய்த மாநகராட்சி ஆணையாளர்

Coimbatore: கோயம்புத்தூர் மாநகராட்சி தெற்கு மண்டலம், வார்டு எண்.99க்கு உட்பட்ட வெள்ளலூர் உரக்கிடங்கில் நடைபெற்று வரும் பயோ-CNG ஆலை கட்டுமானப் பணிகளை மாநகராட்சி ஆணையாளர் கட்டா ரவி தேஜா நேரில் பார்வையிட்டு ஆய்வு மேற்கொண்டார்.

நவம்பர் 10, 2026 அன்று நடைபெற்ற இந்த ஆய்வின் போது, அங்கு நடைபெற்று வரும் கட்டுமானப் பணிகளை விரைவுபடுத்தி, திட்டமிட்ட கால அட்டவணையின்படி பணிகளை விரைந்து முடித்து, திட்டத்தைச் செயல்படுத்திட சம்பந்தப்பட்ட அலுவலர்கள் மற்றும் ஒப்பந்ததாரருக்கு கட்டா ரவி தேஜா அறிவுறுத்தினார்.

அதனைத் தொடர்ந்து, இறைச்சிக் கூடத்தில் செயல்பட்டு வரும் கழிவுநீர் சுத்திகரிப்பு நிலையத்தையும் (ETP) அவர் நேரில் ஆய்வு செய்தார். தற்போதுள்ள கழிவுநீர் சுத்திகரிப்பு நிலையத்தைச் சீரமைத்து, நவீன தொழில்நுட்பங்களுடன் மேம்படுத்துவதற்குத் தேவையான நடவடிக்கைகளை மேற்கொள்ள சம்பந்தப்பட்ட அலுவலர்களுக்கு அவர் அறிவுறுத்தினார்.

மேலும், கழிவுநீரை சுற்றுச்சூழல் தரநிலைகளுக்கு இணங்க முறையாகச் சுத்திகரித்து, பாதுகாப்பான முறையில் வெளியேற்றுவதை உறுதி செய்யவும், சுத்திகரிப்பு நிலையத்தின் செயல்திறனை மேம்படுத்தவும் சம்பந்தப்பட்ட அலுவலர்களுக்கு மாநகராட்சி ஆணையாளர் அறிவுறுத்தினார்.

இந்த ஆய்வின் போது, உதவி செயற்பொறியாளர் கனகராஜ் (பொ), உதவி பொறியாளர் சந்தீப்குமார், சுகாதார ஆய்வாளர் பாலகுமார் மற்றும் மாநகராட்சி அலுவலர்கள் உடனிருந்தனர்.