Govt Notification
கோவை மாவட்ட ஆட்சியர், மாநகராட்சி ஆணையாளர் வடக்கு மண்டலத்தில் சுகாதாரம் மற்றும் குடிமைப் பணிகளை ஆய்வு
SimpliCity News Team · 5 days ago

Coimbatore: கோவை மாநகராட்சி, பீளமேடு பகுதியில் உள்ள நகர்ப்புற ஆரம்ப சுகாதார நிலையத்தினை மாவட்ட ஆட்சித்தலைவர் பவன்குமார் க.கிரியப்பனவர் மற்றும் மாநகராட்சி ஆணையாளர் கட்டா ரவி தேஜா ஆகியோர் நேரில் பார்வையிட்டு ஆய்வு மேற்கொண்டு, அங்கு வழங்கப்படும் சிகிச்சை குறித்து மருத்துவ பயனாளிகளிடம் கேட்டறிந்தனர்.
கோயம்புத்தூர் மாநகராட்சி, வடக்கு மண்டலம், வார்டு எண்.26-க்குட்பட்ட பீளமேடு பகுதியில் உள்ள நகர்ப்புற ஆரம்ப சுகாதார நிலையம், வி.கே.சாலையில் உள்ள சமுதாய கழிப்பறை மற்றும் உலர் கழிவுகளை தரம் பிரிக்கும் மையம் ஆகியவற்றை பவன்குமார் க.கிரியப்பனார், கட்டா ரவி தேஜா ஆகியோர் இன்று (17.11.2026) நேரில் பார்வையிட்டு, ஆய்வு மேற்கொண்டனர்.
நகர்ப்புற ஆரம்ப சுகாதார நிலையத்தினை நேரில் பார்வையிட்டு, ஆய்வு மேற்கொண்டு, அங்கு வழங்கப்படும் சிகிச்சை குறித்து மருத்துவ பயனாளிகளிடம் கேட்டறிந்த பின்னர், கர்ப்பிணி தாய்மார்களுக்கு யோகா பயிற்சி வழங்கப்படுவதை நேரில் பார்வையிட்டனர். மேலும், மருத்துவமனைக்கு நாள்தோறும் வருகைபுரியும் மருத்துவ பயனாளிகள் விபரம் மற்றும் அவர்களுக்கு வழங்கப்படும் சிகிச்சை முறைகள் குறித்தும், மருத்துவர்களிடம் கேட்டறிந்தனர்.
அதனைத் தொடர்ந்து, வடக்கு மண்டலம், வார்டு எண்.26-க்குட்பட்ட பீளமேடு, வி.கே.சாலை பகுதியில் உள்ள சமுதாய கழிப்பறையினை நேரில் பார்வையிட்டு, ஆய்வு மேற்கொண்டு, கழிவறையினை தூய்மையாக பராமரித்திட சம்மந்தப்பட்ட அலுவலர்களுக்கு அறிவுறுத்தினர்.
பின்னர், பீளமேடு, வி.கே.சாலை பகுதியில் அமைந்துள்ள உலர் கழிவுகளை தரம் பிரிக்கும் மையத்தினை நேரில் பார்வையிட்டு, அதன் செயல்பாடுகள் குறித்து கேட்டறிந்தனர். இம்மையத்தில், வீடுகள் மற்றும் வணிக நிறுவனங்களில் இருந்து சேகரிக்கப்படும் பிளாஸ்டிக் பொருட்கள், காகிதம் மற்றும் அட்டைகள், கண்ணாடி பாட்டில்கள், உலோகப் பொருட்கள் மற்றும் மறுசுழற்சி செய்யக்கூடிய இதர பொருட்களை தரம் பிரித்து, மறுசுழற்சிக்கு பயன்படுத்தும் வகையில் தரம் பிரிக்கப்பட்டு வருவதை பார்வையிட்டனர்.
பின்னர், சரவணம்பட்டி, வண்ணார் குட்டை தூர்வாரப்பட்டு, மழைநீர் சேகரிக்கும் வகையில் அமைக்கப்பட்டுள்ளதை நேரில் பார்வையிட்டு, ஆய்வு மேற்கொண்டு, குட்டை வளாக பகுதியில், பவன்குமார் க.கிரியப்பனார், கட்டா ரவி தேஜா ஆகியோர் மரக்கன்றுகளை நட்டு வைத்தனர்.
இந்த ஆய்வுகளின்போது, வடக்கு மண்டல தலைவர் வே.கதிர்வேல், மாநகர நல அலுவலர் சுபாஷ்காந்தி, உதவி ஆணையர் மோகனசுந்தரி, செயற்பொறியாளர் தேவதாஸ், உதவி செயற்பொறியாளர் சத்தியமூர்த்தி(பொ), மாமன்ற உறுப்பினர் சித்ரா வெள்ளியங்கிரி, மண்டல சுகாதார அலுவலர் முருகன், உதவி பொறியாளர்கள் குமார், சரண்யா, சுகாதார ஆய்வாளர் பாஸ்கர் மற்றும் மாநகராட்சி அலுவலர்கள் உட்பட பலர் உடனிருந்தனர்.


