கோவையில் கனமழை: நரசிம்மநாயக்கன்பாளையத்தில் தடுப்பணை வெள்ளத்தில் சிக்கிய இருசக்கர பயணி மீட்பு

Coimbatore: கோவை மாவட்டம் நரசிம்மநாயக்கன்பாளையம் பகுதியில் கனமழையால் ஏற்பட்ட வெள்ளப்பெருக்கில் இருசக்கர வாகனத்தில் சென்றவர் சிக்கிய நிலையில், அருகில் இருந்தவர்கள் உடனடியாக அவரை மீட்டு கரைக்கு அழைத்து வந்தனர். கோவை மாவட்டத்தின் புறநகர் பகுதிகளில் திங்கள்கிழமை மாலை பெய்த கனமழையால் பல இடங்களில் வெள்ளப்பெருக்கு ஏற்பட்டது. நரசிம்மநாயக்கன்பாளையம் பகுதியில் புதுப்பாளையம் தடுப்பணை நிரம்பி உபரிநீர் வெளியேறியதால், ரயில்வே மேம்பாலத்தின் கீழ் பகுதியில் வெள்ளம் பெருக்கெடுத்து ஓடியது. அப்போது அந்த வழியாக இருசக்கர வாகனத்தில் வெள்ளத்தைக் கடக்க முயன்ற ஒருவர், நீரோட்டத்தில் நிலைதடுமாறி கீழே விழுந்தார். இதையடுத்து அருகில் இருந்தவர்கள் உடனடியாக அவரை மீட்டு கரைக்கு அழைத்து வந்தனர். கோவை மாவட்டத்தில் இன்று காலை முதல் வெயில் அதிகரித்து காணப்பட்ட நிலையில், மாலை நேரத்தில் பல்வேறு பகுதிகளில் பரவலாக மழை பெய்தது. குறிப்பாக துடியலூர், பெரியநாயக்கன்பாளையம், நரசிம்மநாயக்கன்பாளையம், கவுண்டம்பாளையம், ஜி.என். மில்ஸ் உள்ளிட்ட புறநகர் பகுதிகளில் சுமார் ஒரு மணி நேரம் கனமழை பெய்தது. இதனால் வெப்பம் தணிந்து, கோவை மற்றும் அதன் புறநகர் பகுதிகளில் குளிர்ச்சியான சூழல் நிலவியது. கோவை, நீலகிரி, திருப்பூர் உள்ளிட்ட மாவட்டங்களில் கனமழைக்கு வாய்ப்புள்ளதாக சென்னை வானிலை ஆய்வு மையம் ஏற்கெனவே தெரிவித்திருந்தது.