வால்பாறையில் 3 கரடிகள் தாக்கி படுகாயமடைந்த நபர் கோவை மருத்துவமனைக்கு மாற்றம்

Coimbatore: வால்பாறை அருகே பச்சமலை எஸ்டேட் பகுதியில் கரடி தாக்குதலில் ஒருவர் படுகாயமடைந்து மருத்துவமனையில் சிகிச்சை பெற்று வருகிறார். கோவை மாவட்டம் வால்பாறை அருகே பச்சமலை எஸ்டேட் பகுதியைச் சேர்ந்தவர் மோசஸ், வயது 51. இவர் ரொட்டிக்கடை பகுதியில் உள்ள டாஸ்மாக் கடைக்குச் சென்றுவிட்டு, தேயிலை தோட்டம் வழியாக பச்சமலை எஸ்டேட்டில் உள்ள தனது குடியிருப்புக்குத் திரும்பிக் கொண்டிருந்தார். அப்போது தேயிலை தோட்டப் பகுதியில் இருந்த மூன்று கரடிகள் மோசஸை தாக்கின. இதில் அவருக்கு தலை, முகம் மற்றும் உடல் பகுதியில் பலத்த காயம் ஏற்பட்டது. இதையடுத்து 108 வாகன உதவியுடன் மோசஸ் வால்பாறை மருத்துவமனைக்கு கொண்டு வரப்பட்டு முதல் உதவி சிகிச்சை அளிக்கப்பட்டது. பின்னர் மேல் சிகிச்சைக்காக அவரை கோவை மருத்துவமனைக்கு கொண்டு சென்றனர்.