கோவை சுந்தராபுரம் பேருந்து நிறுத்தத்தில் மாமூல் கேட்டு மிரட்டிய நபர் கைது

Coimbatore: கோவை சுந்தராபுரம் பஸ் நிறுத்தத்தில் பொதுமக்களை மிரட்டி மாமூல் வசூலிக்க முயன்ற நபர் ஒருவரை சுந்தராபுரம் போலீசார் கைது செய்து சிறையில் அடைத்துள்ளனர். கோவை சுந்தராபுரம் குறிச்சி பகுதியைச் சேர்ந்த குருசாமியின் மகன் மோகன்ராஜ் (வயது 30). சம்பவத்தன்று காலை 7 மணி அளவில் மோகன்ராஜ் பொள்ளாச்சி மெயின் ரோட்டில், சுந்தராபுரம் பஸ் நிறுத்தம் அருகே நின்று கொண்டு இருந்தார். அப்போது அங்கு சுந்தராபுரம் குப்பை போயர் வீதியைச் சேர்ந்த செல்வராஜின் மகன் முருகன் (எ) சிராஷ் (வயது 39) என்பவர் திடீரென வந்து உள்ளார். இவர் தற்போது பிள்ளையார்புரம் கிருஷ்ணா கல்லூரி அருகே உள்ள செந்தமிழ் நகரில் வசித்து வருகிறார். அங்கு வந்த முருகன், பஸ் நிறுத்தத்தில் நின்று இருந்த மோகன்ராஜிடம் தகராறு செய்து அசிங்கமான வார்த்தைகளால் திட்டி உள்ளார். அத்துடன் ஆத்திரமடைந்த அவர், மோகன்ராஜை மிரட்டி அவரிடம் இருந்து ரூ.500 பணத்தை மாமூலாக கேட்டு மிரட்டி உள்ளார். பணம் தராவிட்டால் கொலை செய்து விடுவதாகவும் பகிரங்க மிரட்டல் விடுத்தார். இதனால் அதிர்ச்சி அடைந்த மோகன்ராஜ் அங்கு இருந்து தப்பித்து சுந்தராபுரம் காவல் நிலையத்திற்குச் சென்று புகார் அளித்தார். இதுகுறித்து சுந்தராபுரம் போலீசார் உடனடியாக வழக்குப் பதிவு செய்து விசாரணை நடத்தினர். தொடர்ந்து சம்பவ இடத்திற்கு விரைந்து சென்ற போலீசார், பொதுமக்களை அச்சுறுத்தி மாமூல் வசூலிக்க முயன்ற முருகன் (எ) சிராஷை சுற்றிவளைத்து கைது செய்தனர். பின்னர் அவர் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார்.