கோவை மாநகராட்சி பள்ளிகளில் மழைநீர் சேகரிப்பு விழிப்புணர்வு கண்காட்சி

Coimbatore: கோவை மாநகராட்சிக்கு உட்பட்ட ஆரம்பப்பள்ளிகளில் பயிலும் மாணவ, மாணவியர்கள் மழைநீர் சேகரிப்பதன் அவசியம் குறித்து பொதுமக்களிடையே விழிப்புணர்வு ஏற்படுத்தும் வகையில் பல்வேறு படைப்புகளுடன் கண்காட்சியில் கலந்து கொண்டனர்.

கோயம்புத்தூர் மாநகராட்சிக்கு உட்பட்ட இரத்தினபுரி, கவுண்டம்பாளையம் இராமசாமி நகர் ஆகிய பகுதிகளில் உள்ள மாநகராட்சி ஆரம்பப்பள்ளிகளின் மாணவ, மாணவியர்கள் அந்தந்த பள்ளிகளில் மழைநீர் சேகரிப்பதன் அவசியம் குறித்து பொதுமக்களிடையே விழிப்புணர்வு ஏற்படுத்தும் வகையில் பல்வேறு படைப்புகளுடன் கண்காட்சியில் கலந்து கொண்டு விழிப்புணர்வு பணிகளை மேற்கொண்டனர்.

கோயம்புத்தூர் மாநகராட்சிக்கு உட்பட்ட ஐந்து மண்டலங்களிலும் மழைநீர் சேகரிப்பதன் அவசியம் குறித்து பொதுமக்களுக்கு விழிப்புணர்வு ஏற்படுத்தப்பட்டு வருகிறது. அந்த வகையில், 08.10.2026 அன்று மத்திய மண்டலத்திற்கு உட்பட்ட இரத்தினபுரி மாநகராட்சி ஆரம்பப்பள்ளி, மேற்கு மண்டலத்திற்கு உட்பட்ட கவுண்டம்பாளையம், இராமசாமி நகர் மாநகராட்சி ஆரம்பப்பள்ளி ஆகிய பள்ளிகளில் மழைநீர் சேகரிப்பதின் அவசியம் குறித்து பொதுமக்களிடையே விழிப்புணர்வு ஏற்படுத்தும் வகையில் பள்ளி மாணவ, மாணவிகளின் பல்வேறு படைப்புகள் மழைநீர் சேகரிப்பு கண்காட்சியில் இடம்பெற்றது.

மேலும், மழைநீர் சேகரிப்பு தொடர்பான கவிதை, பேச்சுப்போட்டி, ஓவியப்போட்டி, பாட்டுப்போட்டி, நடனப்போட்டி ஆகிய போட்டிகள் நடத்தப்பட்டு, இப்போட்டியில் பங்கேற்ற அனைவருக்கும் சிறப்பு பரிசுகள் வழங்கப்பட்டு ஊக்குவிக்கப்பட்டது.

அதனைத் தொடர்ந்து, வடக்கு மண்டலத்திற்கு உட்பட்ட பீளமேடு மாநகராட்சி ஆரம்பப்பள்ளியில் பயிலும் மாணவ, மாணவியர்கள், குப்பைகளை நான்கு வகைகளாக தரம் பிரிப்பது தூய்மைப் பணியாளர்களிடம் வழங்குவது தொடர்பாக விழிப்புணர்வு ஏற்படுத்தும் வகையில் விழிப்புணர்வு கண்காட்சி நடைபெற்றது.

இந்நிகழ்ச்சியில், 31-வது வார்டு மாமன்ற உறுப்பினர் வைரமுருகன், மாநகராட்சி கல்விப்பிரிவு மேற்பார்வையாளர் பூங்கொடி, தலைமை ஆசிரியர்கள் சகுந்தலா, மேரி(பொ), அற்புதமேரி, அனைத்து ஆசிரியர்கள், மாணவ, மாணவியர்கள், பள்ளி மேலாண்மைக்குழு உறுப்பினர்கள், பெற்றோர்கள் உட்பட பலர் கலந்து கொண்டனர்.