கோவை துடியலூரில் மோடி கபடி கோப்பை 2026 போட்டி தொடக்கம்

Coimbatore: பாரத பிரதமர் நரேந்திர மோடியின் 76வது பிறந்தநாளை முன்னிட்டு கோவை துடியலூரில் பாரதிய ஜனதா கட்சி இளைஞர் அணி சார்பில் மோடி கபடி கோப்பை 2026 என்ற தலைப்பில் மாபெரும் கபடி போட்டி நடைபெற்றது. இப்போட்டிகளை பாஜக மாநிலத் தலைவர் நயினார் நாகேந்திரன் தொடங்கி வைத்தார்.

பாரத பிரதமர் நரேந்திர மோடி அவர்களின் 76வது பிறந்தநாளை முன்னிட்டு நாடு முழுவதும் சேவா சங்கல்ப அபியான் என்ற தலைப்பில் பல்வேறு நிகழ்ச்சிகள் நடைபெற்று வருகின்றன. இதன் ஒரு பகுதியாக கோவை மாவட்டம் துடியலூரில் இந்த கபடி போட்டி ஏற்பாடு செய்யப்பட்டது.

போட்டிகளை சிறப்பு விருந்தினராக கலந்து கொண்ட தமிழக பாரதிய ஜனதா கட்சியின் மாநிலத் தலைவர் நயினார் நாகேந்திரன், கபடி வீரர்களிடம் கைகுழுக்கி வாழ்த்து தெரிவித்தும், டாஸ் போட்டும் போட்டிகளை தொடங்கி வைத்து பார்வையிட்டார்.

இப்போட்டியில் கோவை மற்றும் சுற்றுவட்டாரங்களில் இருந்து 56 கபடி அணி வீரர்கள் பங்கேற்று விளையாடினர். முதல் 4 இடங்களை பிடிக்கும் அணிகளுக்கு பரிசுக்கோப்பை மற்றும் ரொக்கப்பரிசுகள் வழங்கப்படுகிறது.

இந்நிகழ்ச்சியில் பாஜக மாவட்டத் தலைவர் ஜே ரமேஷ் குமார், அபிஷேக், மாநில பொதுச் செயலாளர் ஏ பி முருகானந்தம், மாநிலச் செயலாளர் நந்தகுமார், மாநில இளைஞரணி துணைத் தலைவர் கிருஷ்ண பிரசாத் உள்ளிட்ட பல நிர்வாகிகள் கலந்து கொண்டனர்.