கோவை கிருஷ்ணம்பதி குளம் அருகே இருசக்கர வாகனம் மோதி ஒருவர் உயிரிழப்பு

Coimbatore: காந்திபார்க் அருகே சாலையில் நடந்து சென்று கொண்டிருந்த மனநலம் பாதிக்கப்பட்டவர் ஒருவர் அடையாளம் தெரியாத வாகனம் மோதி உயிரிழந்த சம்பவத்தில், தப்பியோடிய வாகன ஓட்டிக்கு போலீசார் வலைவீசி வருகின்றனர்.

கோவை நாகராஜபுரம் தெருவைச் சேர்ந்தவர் பாலச்சந்தர் மகன் வீரமணி (வயது 40). இவர் மனநலம் பாதிக்கப்பட்டவர் எனக் கூறப்படுகிறது. நேற்று முன்தினம் இரவு சுண்டப்பாளையம் சாலையில் பனமரத்தூர், கிருஷ்ணம்பதி குளம் அருகே சாலையின் வலதுபுறமாக வீரமணி நடந்து சென்று கொண்டிருந்தார்.

அப்போது, மேற்கில் இருந்து கிழக்கு நோக்கி அதிவேகமாகவும் அஜாக்கிரதையாகவும் வந்த அடையாளம் தெரியாத இருசக்கர வாகனம் ஒன்று வீரமணி மீது பலமாக மோதி விட்டு நிற்காமல் தப்பிச் சென்றது.

இதில் தூக்கி வீசப்பட்ட வீரமணிக்கு தலையில் பலத்த காயம் ஏற்பட்டு ரத்த வெள்ளத்தில் சம்பவ இடத்திலேயே பரிதாபமாக உயிரிழந்தார்.

இச்சம்பவம் தொடர்பாக வீரமணியின் மகன் பிரசாத் (வயது 24) மேற்கு போக்குவரத்து புலனாய்வு பிரிவு போலீசில் புகார் அளித்தார். இன்ஸ்பெக்டர் ஆர். விஸ்வநாதன் வழக்குப்பதிவு செய்து, விபத்தை ஏற்படுத்தி தப்பிச்சென்ற நபரை தீவிரமாக தேடி வருகிறார்.