கோவை நரசிம்மநாயக்கன்பாளையத்தில் தவெக சார்பில் இலவச இ-சேவை சிறப்பு முகாம்

Coimbatore: கோவை நரசிம்மநாயக்கன்பாளையம் பேரூராட்சிக்கு உட்பட்ட 6 வது வார்டு பாலாஜி நகர் கோவில் மைதானத்தில் தமிழக வெற்றிக் கழகம் பெரியநாயக்கன்பாளையம் கிழக்கு ஒன்றியம் நரசிம்மநாயக்கன்பாளையம் பேரூர் கழகம் சார்பில் இலவச இ-சேவை சிறப்பு முகாம் நடைபெற்றது. இந்த முகாமில் சுற்றுப் பகுதிகளில் இருந்து திரளான பொதுமக்கள் பங்கேற்று பயனடைந்தனர்.

கோவை கவுண்டம்பாளையம் தமிழக வெற்றிக் கழக சட்டமன்ற உறுப்பினர் டாக்டர் கனிமொழி சந்தோஷ் அறிவுறுத்தலின் படி தமிழக வெற்றிக் கழகம் பெரியநாயக்கன்பாளையம் கிழக்கு ஒன்றியம் நரசிம்மநாயக்கன்பாளையம் பேரூர் கழகம் மற்றும் சஷ்டி எண்டர்பிரைசஷ் இணைந்து மாதம் தோறும் ஒவ்வொரு பகுதிகளாக இலவச இ-சேவை சிறப்பு முகாமை நடத்தி வருகின்றனர். இதன் ஒரு பகுதியாக கோவை நரசிம்மநாயக்கன்பாளையம் பேரூராட்சிக்கு உட்பட்ட 6 வது வார்டு பாலாஜி நகர் கோவில் மைதானத்தில் இலவச இ-சேவை சிறப்பு முகாம் நடைபெற்றது.

காலை 9 மணி முதல் மதியம் 1 மணி வரை நடைபெற்ற இம்முகாமில் பங்கேற்கும் பயனாளிகள் அரசுக்கு செலுத்த வேண்டிய கட்டணம் மட்டும் செலுத்தினால் போதுமானது, சேவை கட்டணம் முற்றிலும் இலவசம் எனவும், கூடுதல் கட்டணம் இன்றி பொதுமக்கள் பயன்பெற ஏற்பாடு செய்திருந்தனர்.

தொடர்ந்து பயனாளிகளிடம் இ-சேவைக்கான ஆவணங்களைப் பெற்று அவர்களுக்குத் தேவையான உதவிகளை செய்த முகாமின் ஒருங்கிணைப்பாளர்கள், மக்களுக்கு தேவையான சேவைகளை அவர்களின் இடத்திற்கே சென்று வழங்கி வருவதாகவும், பொதுமக்கள் எந்த குறை இருந்தாலும் தங்களிடம் தெரிவிக்கலாம் என்றும், அவற்றை உடனடியாக தீர்க்க தேவையான நடவடிக்கைகள் எடுப்போம் என்றும் தவெக நிர்வாகிகள் முகாமில் பங்குபெற்ற மக்களிடம் தெரிவித்தனர்.

முகாமில், ஜாதி சான்றிதழ், இருப்பிட சான்றிதழ், வருமானச் சான்றிதழ், முதல் பட்டதாரி சான்றிதழ், ஆதரவற்ற பெண் சான்றிதழ், வேளாண் வருமானச் சான்றிதழ், குடும்ப இடமாற்றச் சான்றிதழ், சிறு குறு விவசாயி சான்றிதழ், சொத்து மதிப்பு சான்றிதழ், பணம் கடன் வாங்கும் உரிமம், முதியோர் ஓய்வூதிய சேவை, விதவை ஓய்வூதிய சேவை, மாற்றுத்திறனாளி ஓய்வூதிய சேவை, ஆதரவற்றோர் ஓய்வூதிய சேவை, ஓய்வூதியர் அட்டை தொடர்பான சேவைகள், வேலைவாய்ப்பு பதிவு புதுப்பித்தல், டிஎன்பிஎஸ்சி ஆன்லைன் சேவைகள், ஆன்லைன் பாட புத்தகம் முன்பதிவு, பான் கார்டு, ஆதார் முகவரி மாற்றம், பி எம் கிஷான், பி எம் ஹவுசிங் லோன் விண்ணப்பம், புதிய ரேஷன் கார்டு, பட்டா விண்ணப்பம், திருமணப் பதிவு, பிறப்பு, இறப்பு சான்றிதழ், பேன் ஆதார் இணைப்பு உள்ளிட்ட சேவைகள் வழங்கப்பட்டன.

வரும் நாட்களில் நரசிம்மநாயக்கன்பாளையம் பகுதியில் உள்ள அனைத்து வார்டுகளிலும் இது போன்ற இலவச இ-சேவை சிறப்பு முகாம் நடைபெறும் என தெரிவிக்கப்பட்டுள்ளது.

இம்முகாமில், ஒன்றிய செயலாளர் நித்தின், நரசிம்மநாயக்கன்பாளையம் தமிழக வெற்றிக் கழகத்தைச் சேர்ந்த நிர்வாகிகள் உள்பட கட்சியினர் திரளானோர் கலந்துகொண்டனர்.