குன்னூர் - பர்லியார் சாலையில் நிலச்சரிவு சீரமைப்பு பணி: கல்லார் சோதனைச் சாவடியில் வாகனங்களுக்குத் தடை

Coimbatore: நீலகிரி மாவட்டம் குன்னூர் மற்றும் பர்லியார் பகுதிகளில் பெய்த கனமழையால் ஏற்பட்ட நிலச்சரிவுகளைத் தொடர்ந்து, மேட்டுப்பாளையம் சாலையில் உள்ள கல்லார் சோதனைச் சாவடியில் இருந்து குன்னூர் மற்றும் ஊட்டி நோக்கிச் செல்லும் வாகனங்களுக்கு அனுமதி மறுக்கப்பட்டுள்ளது. மீட்புப் பணிகளில் ஈடுபடும் வாகனங்களுக்கு மட்டுமே தற்போது அனுமதி அளிக்கப்படுகிறது.

நிலச்சரிவுகளைச் சீரமைக்கும் பணிகள் இரவு பகலாகத் தீவிரமாக நடைபெற்று வரும் நிலையில், குன்னூர் பர்லியார் பகுதியில் 25 சென்டிமீட்டர் மழை பதிவாகியுள்ளது. இதன் காரணமாக 10-க்கும் மேற்பட்ட இடங்களில் நிலச்சரிவு மற்றும் மரங்கள் விழுந்ததால் போக்குவரத்து கடுமையாகப் பாதிக்கப்பட்டுள்ளது.

இதற்கிடையே, குன்னூரில் இருந்து மேட்டுப்பாளையம் நோக்கிச் சென்ற அரசுப் பேருந்து நிலச்சரிவில் சிக்கியதில், அதன் ஓட்டுநர் சம்பவ இடத்திலேயே உயிரிழந்தார். அதே பகுதியில் சுமார் 100 அடி பள்ளத்தில் கோழிகளை ஏற்றிச் சென்ற வாகனம் கவிழ்ந்து நொறுங்கிய நிலையில், அதனை மீட்கும் பணியும் சவாலாக உள்ளது. இந்த விபத்தில் வாகன ஓட்டுநர் அதிர்ஷ்டவசமாக உயிர் தப்பியுள்ளார்.

நிலச்சரிவு ஏற்பட்ட பகுதிகளில் கோவை மற்றும் நீலகிரி மாவட்ட நெடுஞ்சாலைத் துறையினர் இணைந்து, 8 ஜேசிபி இயந்திரங்களின் உதவியுடன் சாலைகளைச் சீரமைக்கும் பணியில் ஈடுபட்டு வருகின்றனர். மேலும், பாதிக்கப்பட்ட சாலைகளில் மணல் மூட்டைகள் அடுக்கப்பட்டு, மண் சரிவைத் தடுக்கும் நடவடிக்கைகளும் மேற்கொள்ளப்பட்டு வருகின்றன.

இதனிடையே, நிலச்சரிவு ஏற்பட்ட பகுதிகளில் புவியியல் துறையினர் நேரில் ஆய்வு செய்து வருகின்றனர். சாலைச் சீரமைப்புப் பணிகள் தொடர்ந்து நடைபெற்று வரும் நிலையில், பாதுகாப்பு கருதி கல்லார் சோதனைச் சாவடியில் வாகனப் போக்குவரத்துக்குத் தடை விதிக்கப்பட்டு, மீட்பு வாகனங்களுக்கு மட்டுமே அனுமதி வழங்கப்படுவது குறிப்பிடத்தக்கது.