கோவை பாரதியார் பல்கலைக்கழக பேராசிரியர் சி. விசுவநாதனுக்கு சர் சி.வி. ராமன் விஞ்ஞானி விருது - 2026

Coimbatore: பாரதியார் பல்கலைக்கழக நானோ அறிவியல் மற்றும் தொழில்நுட்பத் துறைப் பேராசிரியர் முனைவர் சி. விசுவநாதனுக்கு, சென்னை ஆவடியிலுள்ள செயின்ட் பீட்டர்ஸ் உயர்கல்வி மற்றும் ஆராய்ச்சி நிறுவனம் சார்பில் 'சர் சி.வி. ராமன் விஞ்ஞானி விருது - 2026' வழங்கப்பட்டுள்ளது.

கடந்த அக்டோபர் 25ஆம் தேதி நடைபெற்ற அந்நிறுவனத்தின் 17ஆவது பட்டமளிப்பு விழாவில் இந்த விருது வழங்கப்பட்டது. நானோ அறிவியல், உணரிகள் மற்றும் உயிரி உணரிகள், ஆற்றல் சேமிப்பு மற்றும் மாற்றம் உள்ளிட்ட துறைகளில் விசுவநாதன் ஆற்றிய சிறப்பான ஆராய்ச்சிப் பங்களிப்புகளைப் பாராட்டி இவ்விருது வழங்கப்பட்டுள்ளது.

பேராசிரியர் சி.விசுவநாதன் 196 ஆய்வுக் கட்டுரைகளை வெளியிட்டுள்ளார். அவரது ஆய்வுகள் 8,209 மேற்கோள்களைப் பெற்றுள்ளன. மேலும், இரண்டு இந்தியக் காப்புரிமைகளையும் அவர் பெற்றுள்ளார். 2024 மற்றும் 2025ஆம் ஆண்டுகளுக்கான உலகின் சிறந்த 2 சதவீத விஞ்ஞானிகள் பட்டியலிலும் இவர் இடம்பெற்றுள்ளார்.

இவரது அறிவியல் ஆராய்ச்சி மற்றும் புத்தாக்கப் பணிகளைப் பாராட்டி, பாரதியார் பல்கலைக்கழகப் பதிவாளர் முனைவர் பேராசிரியர் ஆர். ராஜவேலு வாழ்த்து தெரிவித்துள்ளார். இந்த விருது பாரதியார் பல்கலைக்கழகத்திற்குப் பெருமை சேர்த்துள்ளது.