பெரியநாயக்கன்பாளையத்தில் வளர்ச்சிப் பணிகளுக்கு அதிகாரிகள் ஒத்துழையாமை – 18 கவுன்சிலர்கள் உள்ளிருப்புப் போராட்டம்

Coimbatore: கோவை மாவட்டம் பெரியநாயக்கன்பாளையம் சிறப்பு நிலை பேரூராட்சிக்கு உட்பட்ட வார்டுகளில் வளர்ச்சிப் பணிகளை மேற்கொள்ள அரசு அதிகாரிகள் ஒத்துழைப்பு வழங்கவில்லை எனக் கூறி பேரூராட்சித் தலைவர் விஸ்வபிரகாஷ் தலைமையில் 18 கவுன்சிலர்கள் மன்ற கூட்ட அலுவலகத்தில் உள்ளிருப்பு போராட்டத்தில் ஈடுபட்டனர். இதனால் அங்கு பரபரப்பு நிலவியது.

கோவை மாவட்டம் பெரியநாயக்கன்பாளையம் சிறப்பு நிலை பேரூராட்சியில் 13 திமுக கவுன்சிலர்கள், 5 அதிமுக கவுன்சிலர்கள் மற்றும் 1 கம்யூனிஸ்ட் கவுன்சிலர் என 19 பேர் உள்ளனர். இதில் திமுகவைச் சேர்ந்த விஸ்வபிரகாஷ் தலைவராக உள்ளார்.

இந்த நிலையில் பேரூராட்சி உறுப்பினர்கள் கூட்டம் பேரூராட்சி தலைவர் விஸ்வபிரகாஷ் தலைமையில் நடைபெற்றது. இதில் கலந்து கொண்ட வார்டு உறுப்பினர்கள் தங்களது வார்டுகளில் பொதுமக்களுக்குத் தேவையான அடிப்படை வசதிகள் மற்றும் வளர்ச்சிப் பணிகளை மேற்கொள்வதற்கு அரசு அலுவலர்கள் உரிய ஒத்துழைப்பு வழங்கவில்லை எனக் குற்றச்சாட்டு எழுப்பினர்.

இதனைக் கண்டித்து, பேரூராட்சித் தலைவர் விஸ்வபிரகாஷ் தலைமையில், 18 வார்டுகளைச் சேர்ந்த உறுப்பினர்கள் அனைவரும் பேரூராட்சி கூட்ட அரங்கிற்குள் அமர்ந்து உள்ளிருப்புப் போராட்டத்தில் ஈடுபட்டனர்.

பொதுமக்களின் அடிப்படைத் தேவைகளை நிறைவேற்றுவதற்கும், வார்டுகளில் வளர்ச்சிப் பணிகளை மேற்கொள்வதற்கும் அதிகாரிகள் ஒத்துழைப்பு வழங்க வேண்டும் என வலியுறுத்தி இந்தப் போராட்டம் நடைபெற்று வருகிறது. இதனால் பெரியநாயக்கன்பாளையம் பேரூராட்சி அலுவலகத்தில் பரபரப்பு நிலவியது.

இது குறித்துப் பேசிய பேரூராட்சி தலைவர் விஸ்வபிரகாஷ், கடந்த ஆட்சி காலத்தில் அனைத்து பணிகளும் விரைவாக நடைபெற்றதாகவும், தற்போது தவெக ஆட்சி அமைந்ததில் இருந்து கடந்த 6 மாதமாக வார்டுகளில் எந்த பணிகளும் நடைபெறுவதில்லை எனவும் தெரிவித்தார். பேரூராட்சியில் பணம் இருந்தும் சாலை வசதி உள்ளிட்ட அடிப்படை வசதிகள் கூட அனுமதி கொடுக்கப்படுவதில்லை எனவும், பேரூராட்சியில் எந்த வரி பாக்கியோ, மின்சார கட்டண பாக்கியோ இல்லை என்றும், ஏற்கனவே முன்கூட்டியே வரிகளையும் வசூல் செய்து வருவதாகவும் அவர் கூறினார்.

இதனைக் கண்டித்துத் தற்போது உள்ளிருப்பு போராட்டம் நடத்தி வருவதாகவும், அதிகாரிகள் இங்கு பேச்சுவார்த்தை நடத்த வேண்டும் என்றும், வரும் காலங்களில் அதிகாரிகள் ஒத்துழைப்பு வழங்காவிட்டால் சாலை மறியல் உள்ளிட்ட போராட்டங்கள் நடத்தப்படும் என்றும் விஸ்வபிரகாஷ் தெரிவித்தார்.