கோவையில் சிஎஸ்ஐ திருமண்டல மகளிர் ஐக்கியம் சார்பில் அமைதிப் பேரணி: 1,500-க்கும் மேற்பட்ட பெண்கள் பங்கேற்பு

Coimbatore: கோவை ரேஸ்கோர்ஸ் பகுதியில் சிஎஸ்ஐ திருமண்டல மகளிர் ஐக்கியம் சார்பில் நடைபெறும் மாநாட்டை முன்னிட்டு, 'அரசியாக முடிசூட்டப்பட அழைக்கப்பட்டவர்கள்' என்ற கருப்பொருளில் அமைதிப் பேரணி நடைபெற்றது. பெண்களின் ஆன்மிக வளர்ச்சி, ஒற்றுமை, தலைமைத்துவம் மற்றும் சமூகப் பங்களிப்பை வலியுறுத்தும் வகையில் இந்த மாநாடு நடைபெற்று வருகிறது.

மாநாட்டில் பங்கேற்பதற்காக கோவை, திருப்பூர், நீலகிரி உள்ளிட்ட மாவட்டங்களில் இருந்து 1,500-க்கும் மேற்பட்ட பெண்கள் ஒரே மாதிரியான சீருடை அணிந்து கலந்துகொண்டனர். மாநாட்டின் தொடக்க நிகழ்வாக, உப்பிலிபாளையம் சிஎஸ்ஐ தேவாலயத்தில் இருந்து பெண்கள் பங்கேற்ற அமைதிப் பேரணி நடைபெற்றது.

கோவை திருமண்டல பிஷப் பிரின்ஸ் கால்வின் தலைமையில் நடைபெற்ற இந்தப் பேரணியை, கோவை திருமண்டல மகளிர் ஐக்கியத் தலைவர் ஐடா கால்வின் மற்றும் சென்னை திருமண்டல மகளிர் ஐக்கியத் தலைவர் இந்திரா பால் ஆகியோர் கொடியசைத்துத் தொடங்கி வைத்தனர். பேரணியில் பங்கேற்ற பெண்கள், தலைமைத்துவம், சமூகப் பங்களிப்பு மற்றும் ஒற்றுமையை வலியுறுத்தும் வாசகங்கள் அடங்கிய பதாகைகளை ஏந்திச் சென்றனர்.

முன்னதாக, செய்தியாளர்களிடம் பேசிய ஐடா கால்வின், கோவை, திருப்பூர் மற்றும் நீலகிரி மாவட்டங்களைச் சேர்ந்த பெண்கள் இந்த மாநாட்டில் பங்கேற்றுள்ளதாகத் தெரிவித்தார். பெண்களுக்கான விழிப்புணர்வை ஏற்படுத்துவது குறித்து மாநாட்டில் எடுத்துரைக்கப்பட உள்ளதாகவும், கிராமப்புறங்களில் வசிக்கும் ஏழை, எளிய பெண்களுக்கு பல்வேறு தொழிற்பயிற்சிகள் வழங்கத் திட்டமிட்டுள்ளதாகவும் கூறினார்.

மேலும், தமிழக முதல்வர் பெண்களின் முன்னேற்றம் மற்றும் விழிப்புணர்வுக்காகப் பல்வேறு நடவடிக்கைகளைத் தொடர்ந்து மேற்கொண்டு வருவதாகக் குறிப்பிட்ட அவர், அதற்காக முதல்வருக்கு நன்றி தெரிவித்தார்.