கோயம்புத்தூர் மாவட்ட அணைகளில் நீர்மட்டம் உயர்வு

Coimbatore: கோயம்புத்தூர் மாவட்டத்தில் உள்ள முக்கிய அணைகளான ஆழியார், பரம்பிக்குளம் மற்றும் சோலையாறு அணைகளின் நீர்மட்டம் தென்மேற்கு பருவமழை காரணமாக தொடர்ந்து உயர்ந்து வருவதாக நீர்வளத்துறை அதிகாரிகள் தெரிவித்துள்ளனர். இதனால் மாவட்ட விவசாயிகள் மகிழ்ச்சி அடைந்துள்ளனர்.

ஆனைமலையை அடுத்த ஆழியார் அணையின் மொத்த கொள்ளளவு 120 அடியாகும். அணையின் நீர்ப்பிடிப்பு பகுதிகளில் இருந்து வரும் நீர் வரத்தால் ஆகஸ்ட் 5ஆம் தேதி நிலவரப்படி 56.51 அடியாக நீர்மட்டம் உள்ளது. அணைக்கு நீர்வரத்து வினாடிக்கு 379 கன அடியாக உள்ளது. அணையில் இருந்து 100 கன அடி நீர் வெளியேற்றப்படுகிறது. மழைப்பொழிவு குறைந்ததால் அணைக்கு நீர்வரத்து தொடர்ந்து குறைந்து வருவதாக அதிகாரிகள் தெரிவித்தனர்.

பொள்ளாச்சி அருகே உள்ள பரம்பிக்குளம் அணையின் கொள்ளளவு 72 அடியாகும். மொத்த கொள்ளளவில் இன்று (ஆகஸ்ட் 5) நிலவரப்படி நீர்மட்டம் 29.88 அடியை எட்டியுள்ளது. மேலும் அணைக்கு வினாடிக்கு 1913 கன அடி நீர் வரத்து உள்ளது. 60 கன அடி நீர் வெளியேற்றப்படுகிறது. தென்மேற்கு பருவமழையால் நீர்மட்டம் தொடர்ந்து உயரும் நிலையில் உள்ளது. இதனால் பொள்ளாச்சி பகுதி விவசாயிகள் மகிழ்ச்சி அடைந்துள்ளனர்.

வால்பாறை அருகேயுள்ள சோலையாறு அணையின் மொத்த கொள்ளளவு 160 அடியாகும். இந்த நிலையில் அணையின் இன்றைய (ஆகஸ்ட் 5) நிலவரப்படி நீர்மட்டம் 94.92 அடியை எட்டியுள்ளது. மேலும் சோலையாறு அணைக்கு வினாடிக்கு 2734 கன அடி நீர் வரத்து உள்ளது மற்றும் 1630 கன அடி வெளியேற்றப்படுகிறது. தொடர்ந்து அணையின் நீர்மட்டம் உயரும் நிலையில் உள்ளது என நீர்வளத்துறை அதிகாரிகள் தெரிவித்தனர்.

தென்மேற்கு பருவமழை தொடர்ந்து பெய்து வருவதால், மாவட்டத்தின் மூன்று முக்கிய அணைகளிலும் நீர்வரத்து சீராக உள்ளது. இதனால் விவசாயத்திற்கு போதுமான அளவு நீர் கிடைக்கும் என விவசாயிகள் எதிர்பார்க்கின்றனர். மேலும் மழை தொடர்ந்தால் அணைகளின் நீர்மட்டம் மேலும் உயரும் என நீர்வளத்துறை அதிகாரிகள் நம்பிக்கை தெரிவித்துள்ளனர்.