உதகை சட்டமன்ற தொகுதி வாக்காளர் பட்டியலில் இருந்து பெயர்கள் நீக்கம் : 17-ம் தேதிக்குள் ஆட்சேபனைகள் தெரிவிக்கலாம்

நீலகிரி: வெளியூர்களுக்கு இடம் பெயர்ந்த நீலகிரி மாவட்டம் இந்துஸ்தான் போட்டோ பிலிம்ஸ் பகுதியைச் சேர்ந்தவர்களின் பெயர்கள், உதகை சட்டமன்றத் தொகுதிக்குட்பட்ட வாக்காளர்களின் பெயர் பட்டியலில் இருந்து நீக்குவதாக அறிவிக்கப்பட்டுள்ளது. 



உதகை சட்டமன்ற தொகுதிக்குட்பட்ட வாக்குச்சாவடி எண்.84-ஐ சேர்ந்த வாக்காளர்கள் இந்துஸ்தான் போட்டோ பிலிம்ஸ் பகுதியில் வசித்து வந்தனர். கடந்த ஏப்., 24-ம் தேதியன்று மூடப்பட்டதால், இங்கு வசித்து வந்த பொதுமக்கள் கோவை, மேட்டுப்பாளையம், மைசூரூ, பெங்களூரூ மற்றும் கூடலூர் உள்ளிட்ட பகுதிகளுக்கும், மாவட்டத்தின் பிற இடங்களுக்கும் இடம்பெயர்ந்து விட்டனர். 

எனவே, இந்தப் பகுதியில் உள்ள வாக்குச்சாவடிக்குட்பட்ட அனைத்து வாக்காளர்களையும், வாக்காளர்பட்டியல் பாகம் எண். 84-ல் இருந்து நீக்கம் செய்ய நடவடிக்கைகள் மேற்கொள்ளப்பட்டு வருகிறது. இது தொடர்பாக ஆட்சேபனைகள் ஏதேனும் இருந்தால், வரும் 17-ம் தேதிக்குள் வாக்காளர் பதிவு அலுவலருக்கு எழுத்து மூலமாக தெரிவிக்குமாறு அறிவிக்கப்பட்டுள்ளது.