பொள்ளாச்சி மற்றும் ஆனைமலையில் 32-பேருக்கு கொரோனா தொற்று!

கோவை: பொள்ளாச்சி மற்றும் ஆனைமலையில் இன்று 32-பேருக்கு கொரோனா தொற்று இருப்பதாக சுகாதாரத்துறை அதிகாரிகள் தகவல் தெரிவித்துள்ளனர்.

பொள்ளாச்சி நகர் மற்றும் சுற்றுவட்டாரப் பகுதிகளில் கொரோனா 2-ம் அலை தொடங்கியது முதல், நோய் பரவல் அதிகரித்துக் காணப்பட்டது. சுகாதாரத்துறை மற்றும் வருவாய்த் துறை அதிகாரிகளின் நடவடிக்கை காரணமாகக் கடந்த சில வாரங்களாகவே நோய்த்தொற்று எண்ணிக்கை 10-க்கும் குறைவாக இருந்து வந்த நிலையில், தற்போது நகர் மற்றும் சுற்றுவட்டாரப் பகுதிகளில், மீண்டும் நோய்த் தொற்று அதிகரித்து வருகிறது.

பொள்ளாச்சி நகரில் இன்று 9-பேருக்கும் வடக்கு ஒன்றியத்தில் 5-பேருக்கும், தெற்கு ஒன்றியத்தில் 7-பேருக்கும், ஆனைமலையில் 11-பேருக்கும் எனப் பொள்ளாச்சி மற்றும் ஆனைமலை சுற்றுவட்டாரப் பகுதிகளில் 32-பேருக்கு நோய்த் தொற்று இருப்பதாக சுகாதாரத்துறை அதிகாரிகள் தெரிவித்தனர்.

நகர் மற்றும் கிராமப் பகுதிகளில் மீண்டும் கொரோனா தொற்று அதிகரித்து வருவதால், அதிகாரிகள் கலக்கம் அடைந்துள்ளனர்.