கோவையில் ஓடும் பேருந்தில் இளைஞரை சரமாரியாக வெட்டிய 4 பேர் கொண்ட கும்பல் - ஒருவர் கைது!

கோவை: கோவையில் ஓடும் பேருந்தில் இளைஞரை 4 பேர் கொண்ட கும்பல், சரமாரியாக வெட்டிய சம்பவம் பெரும் பரபரப்பை ஏற்படுத்தியுள்ளது.

கோவையில் ஓடும் பஸ்சில் வாலிபரை 4 பேர் கொண்ட கும்பல் அரிவாளால் வெட்டியது. பஸ்சில் இருந்த பயணிகள் ஒருவரை மடக்கிப்பிடித்து போலீசில் ஒப்படைத்தனர்.

கோவை சவுரிபாளையத்தை சேர்ந்த கண்ணன் என்பவருடைய மகன் கமலேஷ் (19). கடந்த சில நாட்களுக்கு முன்பு புலியகுளத்தில் நடந்த மாரியம்மன் கோவில் திருவிழாவில் நடந்த தகராறில், சந்தோஷ் என்பவரை கமலேஷ் கத்தியால் தாக்கியதாக தெரிகிறது. இதில் சந்தோஷ்குமாருக்கு காயம் ஏற்பட்டது.

ராமநாதபுரம் போலீசார் இதுகுறித்து வழக்குப்பதிவு செய்து இருந்தனர். இந்நிலையில், தன்னை கத்தியால் குத்தியதால் கமலேசை பழிவாங்க சந்தோஷ் திட்டமிட்டார். இதனிடையே நேற்றிரவு 8 மணியளவில் சிங்காநல்லூரில் இருந்து தீத்திப்பாளையம் நோக்கி சென்ற எஸ்.3 அரசு பேருந்தில் கமலேஷ் பயணம் செய்தார்.

கமலேஷ் பேருந்தில் ஏறுவதை பார்த்த சந்தோஷ் உள்பட 4 பேர் 2 மோட்டார் சைக்கிள்களில் அந்த பேருந்தை பின்தொடர்ந்தனர். கோவை அரசு மருத்துவமனை நிறுத்தத்தில் பேருந்து நின்றதும், மோட்டார் சைக்கிள்களை பேருந்தின் முன் நிறுத்திவிட்டு பேருந்திற்குள் ஏறிய 4 பேரும், கமலேஷை அரிவாளால் சரமாரியாக வெட்டியதாக தெரிகிறது.

இதில் அவருக்கு தலையில் வெட்டு விழுந்தது. தப்பி ஓட முயன்றார். இந்த சம்பவத்தை பார்த்ததும் சில பயணிகள் பேருந்தில் இருந்து இறங்கி அலறியடித்து ஓட்டம் பிடித்தனர். சில பயணிகள் துணிச்சலுடன் அரிவாளால் வெட்டிய கும்பலை மடக்கிப்பிடிக்க முயன்றனர்.



அதில், 3 பேர் தப்பி ஓடிய நிலையில், சந்தோஷ் குமார் என்பவர் மட்டும் பயணிகளிடம் பிடிபட்டார். அவரை ரேஸ்கோர்ஸ் காவல்நிலையத்தில் ஒப்படைத்துள்ளனர். காயமடைந்த கமலேஷ் சிகிச்சைக்காக அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். இந்த பயங்கர சம்பவம் கோவையில் பரபரப்பை ஏற்படுத்தியுள்ளது.