கோவை விமான நிலையத்தில் பயணியிடம் பணம் திருடிய பாதுகாப்பு ஊழியர் கைது

கோவை: கோவை விமான நிலையத்தில் பயணி ஒருவரிடமிருந்து பணம் திருடிய பாதுகாப்பு ஊழியர் கைது செய்யப்பட்டுள்ளார்.

கோவை விமான நிலையத்தில் இருந்து உள்நாடு மற்றும் வெளிநாடுகளுக்கு விமானங்கள் இயக்கப்பட்டு வருகின்றன. விமான நிலையத்திற்கு வரும் பயணிகளின் உடைமைகளை அதிகாரிகள் சோதனை செய்வது வழக்கம். இந்தப் பணிக்கு தனியார் நிறுவனம் மூலம் ஒப்பந்த அடிப்படையில் பாதுகாப்பு ஊழியர்கள் நியமிக்கப்பட்டுள்ளனர்.

ஜூலை 13 அன்று விமான நிலையத்தில் அதிகாரிகள் மற்றும் பாதுகாப்பு ஊழியர்கள் பயணிகளின் உடைமைகளை சோதனை செய்து கொண்டிருந்தனர். அப்போது, பாதுகாப்பு ஊழியர் சிவக்குமார் (58) என்பவர் ஒரு பயணியின் பையை வாங்கி ஸ்கேனிங் எந்திரத்திற்குள் அனுப்பி சோதனை செய்தார். அந்த நேரத்தில், அவர் பையில் இருந்த 660 ரூபாயை திருடினார்.

இதனைக் கவனித்த பயணி உடனடியாக அங்கு பாதுகாப்பு பணியில் இருந்த அதிகாரிகளிடம் புகார் அளித்தார். இதையடுத்து, மத்திய தொழில் பாதுகாப்பு படையின் இன்ஸ்பெக்டர் அஜய்குமார் (39), பீளமேடு காவல் நிலையத்தில் முறையான புகார் அளித்தார்.

புகாரின் அடிப்படையில், காவல்துறையினர் விசாரணை மேற்கொண்டனர். விசாரணையில் குற்றம் நிரூபிக்கப்பட்டதை அடுத்து, சூலூர் செங்கத்துறையைச் சேர்ந்த பாதுகாப்பு ஊழியர் சிவக்குமார் கைது செய்யப்பட்டார்.

இச்சம்பவம் விமான நிலைய பாதுகாப்பு அமைப்பில் பெரும் அதிர்வலைகளை ஏற்படுத்தியுள்ளது. பயணிகளின் பாதுகாப்பை உறுதி செய்யும் பொறுப்பில் உள்ளவரே இத்தகைய குற்றத்தில் ஈடுபட்டது கடும் கண்டனத்திற்குரியது என விமான நிலைய அதிகாரிகள் தெரிவித்துள்ளனர்.