கோவை PRS வளாகத்தில் புதுப்பிக்கப்பட்ட மோட்டார் வாகன பிரிவு அலுவலகம் திறப்பு

கோவை: கோவை PRS வளாகத்தில் உள்ள கவாத்து மைதானம் அருகில் அமைந்துள்ள சுமார் 100 ஆண்டுகள் பழமை வாய்ந்த மோட்டார் வாகன பிரிவு அலுவலக கட்டிடம் மறுசீரமைக்கப்பட்டுள்ளது.



இந்த புதுப்பிக்கப்பட்ட கட்டிடத்தை மாநகர காவல் ஆணையாளர் பாலகிருஷ்ணன் திறந்து வைத்து, பின்னர் பார்வையிட்டார்.



இந்த மறுசீரமைப்பின் ஒரு பகுதியாக, கட்டிடத்தின் பின்புறத்தில் காவலர்களுக்கான பல புதிய வசதிகள் சேர்க்கப்பட்டுள்ளன.



இதில் காவலர்களுக்கான ஓய்வு அறை, இசைவாதியங்களுக்கான தனி அறை, மின்சார அறைகள் மற்றும் புதிய கழிவறைகள் ஆகியவை அடங்கும். இந்த புதிய வசதிகள் காவலர்களின் பணிச்சூழலை மேம்படுத்தும் என எதிர்பார்க்கப்படுகிறது.



நிகழ்வின் போது காவலர்களுடன் உரையாடிய மாநகர காவல் ஆணையாளர் பாலகிருஷ்ணன், பழைய கட்டிடங்களை பாதுகாக்கும் நோக்கத்துடன் இந்த மறுசீரமைப்பு மேற்கொள்ளப்பட்டதாக தெரிவித்தார். "பழைய கட்டிடங்களை இடிக்க வேண்டாம் என்ற எண்ணத்தில் இந்த மறுசீரமைப்பு செய்யப்பட்டுள்ளது," என்று அவர் குறிப்பிட்டார்.

மேலும், புதிதாக கட்டப்பட்டுள்ள ஓய்வு அறைகள் மற்றும் கழிவறைகள் கவாத்து பயிற்சி மேற்கொள்ளும் காவலர்களுக்கு மிகவும் பயனுள்ளதாக இருக்கும் என்றும், குறிப்பாக பெண் காவலர்களுக்கு இது பெரிதும் உதவியாக இருக்கும் என்றும் அவர் தெரிவித்தார்.