கோவை வெள்ளலூர் அருகே பெட்டிக்கடையில் 30 கிலோ குட்கா பறிமுதல்: இருவர் கைது

கோவை: கோவை மாவட்டம் வெள்ளலூர் அருகே உள்ள பெட்டிக்கடையில் 30 கிலோ குட்கா பறிமுதல் செய்யப்பட்டதுடன், இரண்டு நபர்கள் கைது செய்யப்பட்டுள்ளனர்.

கோவை போத்தனூர் போலீஸ் சப்-இன்ஸ்பெக்டர் ராக்கியப்பன் நேற்று (ஆகஸ்ட் 30) வெள்ளலூர் புற்றுக்கண் பாலம் பகுதியில் உள்ள ஒரு பெட்டி கடையில் திடீர் சோதனை நடத்தினார். இந்த சோதனையின் போது, கடையில் 30 கிலோ தடை செய்யப்பட்ட புகையிலைப் பொருட்கள் (குட்கா) இருந்தது கண்டுபிடிக்கப்பட்டது. இந்த புகையிலை பொருட்கள் அனைத்தும் உடனடியாக பறிமுதல் செய்யப்பட்டன.

இந்த சம்பவம் தொடர்பாக போலீசார் மேற்கொண்ட விசாரணையில், இந்த தடைசெய்யப்பட்ட புகையிலை பொருட்களை விற்பனை செய்து வந்தவர்கள் வெள்ளலூரைச் சேர்ந்த ரமேஷ் (வயது 50) மற்றும் குனியமுத்தூர் செல்வம் நகரைச் சேர்ந்த அசாருதீன் (வயது 30) என தெரியவந்தது. இதையடுத்து இவர்கள் இருவரும் போலீசாரால் கைது செய்யப்பட்டனர்.

கைது செய்யப்பட்ட இருவரிடமிருந்தும் ஒரு மொபட் மற்றும் ஒரு கார் ஆகியவையும் பறிமுதல் செய்யப்பட்டுள்ளன. இந்த வழக்கில் மேலும் விசாரணை நடத்தி வருவதாக போலீசார் தெரிவித்துள்ளனர்.