கோவையில் நிர்மலா சீதாராமனுக்கு எதிராக திமுக கூட்டணி கட்சிகளின் மாபெரும் கண்டன ஆர்ப்பாட்டம்

Coimbatore: கோவை டாடாபாத் பவர் ஹவுஸ் அருகில், திமுக மற்றும் இந்திய கூட்டணிக் கட்சிகளின் சார்பில் மாபெரும் கண்டன ஆர்ப்பாட்டம் நடைபெற்றது. இந்த ஆர்ப்பாட்டம் ஒன்றிய நிதி அமைச்சர் நிர்மலா சீதாராமனுக்கு எதிராக நடத்தப்பட்டது.

கோவை GST கூட்டத்தில் தொழில்முனைவோரை அவமானப்படுத்தி, மிரட்டி மன்னிப்பு கேட்க வைத்த நிர்மலா சீதாராமனின் செயலைக் கண்டித்து இந்த ஆர்ப்பாட்டம் நடைபெற்றது. 16-9-2024 திங்கட்கிழமை மாலை 5.00 மணியளவில் தொடங்கிய இந்த நிகழ்வில் திமுக இந்திய கூட்டணிக் கட்சிகளின் மாநில, மாவட்டத் தலைவர்கள் கண்டன உரை நிகழ்த்தினர்.



கோவை மாநகர் மாவட்ட திமுக செயலாளர் நா. கார்த்திக் தலைமையில் நடைபெற்ற இந்த ஆர்ப்பாட்டத்தில் பல முக்கிய தலைவர்கள் பங்கேற்றனர். வடக்கு மாவட்ட திமுக செயலாளர் தொ.அ.ரவி, தெற்கு மாவட்ட திமுக செயலாளர் தளபதி முருகேசன், மாநகர் மாவட்ட திமுக அவைத் தலைவர் கணபதி ராஜ்குமார் எம்பி, கோவை மாநகராட்சி மேயர் இரா.ரங்கநாயகி ஆகியோர் முக்கிய பங்கு வகித்தனர்.

இந்திய தேசிய காங்கிரஸ் கட்சியின் தேசிய செயலாளர் மயூரா எஸ்.ஜெயகுமார், மதிமுக ஆடிட்டர் அர்ஜூன் ராஜ், சி.பி.ஐ.எம். மாவட்டச் செயலாளர் சி.பத்மநாபன், சி.பி.ஐ. மாவட்ட செயலாளர் சிவசாமி, த.பெ.தி.க. பொதுச் செயலாளர் கு.இராமகிருட்டிணன், விடுதலைச் சிறுத்தைகள் கட்சியின் குமணன் உள்ளிட்ட பல்வேறு கட்சிகளின் தலைவர்களும் இந்த ஆர்ப்பாட்டத்தில் கலந்து கொண்டனர்.



மாவட்ட திமுக துணைச் செயலாளர்கள், நிர்வாகிகள், தலைமை கழக நிர்வாகிகள், தலைமை செயற்குழு உறுப்பினர்கள், துணை மேயர் இரா.வெற்றிச்செல்வன் ஆகியோரும் இந்த ஆர்ப்பாட்டத்தில் பங்கேற்றனர். மேலும், திமுக இந்திய கூட்டணிக் கட்சிகளின் நகர, ஒன்றிய, பகுதி, வார்டு, பேரூராட்சி செயலாளர்கள், அனைத்து உள்ளாட்சிப் பிரதிநிதிகள், செயல்வீரர்கள், தொண்டர்கள் என ஆயிரக்கணக்கானோர் இந்த கண்டன ஆர்ப்பாட்டத்தில் கலந்து கொண்டனர்.