கோவை மாவட்டம் காரமடை பகுதியில் விவசாய நிலத்துக்குள் புகுந்த காட்டு யானை உடல்நலக்குறைவால் சுருண்டு விழுந்தது.
கோவை - மேட்டுப்பாளையம் சாலையில் உள்ள காரமடைப் பகுதியில் கடந்த சில நாட்களாக இரண்டு அல்லது 3 யானைகள் கூட்டம் கூட்டமாக குடியிருப்பு பகுதிகளுக்குள் வந்து அச்சுறுத்தி வந்ததாக அப்பகுதி மக்கள் தெரிவித்தனர். இந்த நிலையில், இன்று (அக்.,14) அதிகாலை யானைக் கூட்டங்கள் மதுக்கரை சரகத்திற்கு உட்பட்ட வனப்பகுதியில் உள்ள விவசாய நிலங்களுக்குள் பகுந்து, பயிர்களை சேதப்படுத்தி அட்டகாசம் செய்து வந்தது.
அப்போது, அதில் ஒரு பெண் யானை ஒன்று உடல்நலகுறைவால் விவசாய நிலத்திலேயே சுருண்டு விழுந்தது. இதைக் கண்ட பொதுமக்கள் உடனடியாக, வனத்துறையினருக்கு தகவல் கொடுத்தனர். அதன்பேரில் விரைந்து வந்த அவர்கள் யானையை எழுப்பி, வனப்பகுதிக்குள் விரட்ட முயற்சி செய்து வருகின்றனர்.