ஈஷா பொறியியல் கல்லூரி சார்பில் 11-வது கிரிக்கெட் போட்டி தொடக்கம்

கோவை : ஈஷா பொறியியல் மற்றும் தொழில்நுட்பக் கல்லூரியின் சார்பில் 3 நாட்கள் நடக்கும் 11-வது கிரிக்கெட் போட்டித் தொடர் இன்று தொடங்கியது. 

கோவை நவக்கரை சாலையில் உள்ள ஈஷா பொறியியல் மற்றும் தொழில்நுட்பக் கல்லூரியில் உடற்கல்வி துறை சார்பில் 11-வது ஈஷா சாம்பியன் டிராபி 2019 கிரிக்கெட் போட்டிக்கு ஏற்பாடு செய்யப்பட்டது. இன்று தொடங்கிய இந்தப் போட்டிகள், 22 வரை என மூன்று நாட்கள் நடக்கிறது. கல்லூரியின் தலைவர் ஈஸ்வரமூர்த்தி தலைமையில் இப்போட்டி நடைபெற்று வருகிறது. 

நாக்-அவுட் முறையில் நடைபெறும் இப்போட்டிகள், கோவை, நீலகிரி, திருப்பூர், ஈரோடு மற்றும் சேலம் ஆகிய மாவட்டங்களிலிருந்தும் மொத்தம் 32 பொறியியல் மற்றும் தொழில்நுட்பக் கல்லூரி அணிகள் பங்கேற்றுள்ளன. 6 ஓவர்கள் கொண்ட போட்டியாக இந்தத் தொடர் நடத்தப்படுகிறது. 

இதில், மகுடத்தைச் சூடும் அணிக்கு ரூ. 6,000 பரிசுத் தொகையும், கேடயம் மற்றும் சான்றிதழ்கள் வழங்கப்படுகிறது. இரண்டாம் இடத்தை பிடிக்கும் அணிக்கு ரூ. 3,000-மும், 3-வது இடத்தைப் பிடிக்கும் அணிக்கு ரூ. 2,000 பரிசு தொகையாகவும் வழங்கப்பட இருக்கிறது. 

இந்த கிரிக்கெட் போட்டி தொடக்க நிகழ்ச்சியில், கல்லூரி தலைமை செயல் அலுவலர் அஜித், நிர்வாக அலுவர் ஸ்ரீகாந்த், கல்லூரி முதல்வர் ராபர்ட் கென்னடி ஆகியோர் கலந்து கொண்டனர்.