பி.எஸ்.ஜி., கோப்பைக்கான கிரிக்கெட் போட்டி : ஸ்ரீராமகிருஷ்ணா கல்லூரி அணி வெற்றி

கோவை: கோவை மாவட்ட கிரிக்கெட் சங்கம் சார்பில் நடைபெற்ற 10ம் ஆண்டு 'பி.எஸ்.ஜி., கோப்பைக்கான' கிரிக்கெட் போட்டியில், ஸ்ரீராமகிருஷ்ணா கலை அறிவியல் கல்லூரி அணி, முகமது ஆசிக் அடித்த இரட்டை சதத்தால் வெற்றி பெற்றது. 

கோவை மாவட்ட கிரிக்கெட் சங்கம் சார்பில், கல்லூரி மாணவர்களுக்கு இடையில், 10ம் ஆண்டு பி.எஸ்.ஜி., கோப்பைக்கான கிரிக்கெட் போட்டி நடைபெற்றது. பி.எஸ்.ஜி., மருத்துவ கல்லூரி 'சி' மைதானத்தில் நடந்த இப்போட்டியில், ஜி.ஆர்.டி., கல்லூரி அணி, ஸ்ரீராமகிருஷ்ணா கலை அறிவியல் கல்லூரி அணிகள் மோதின. 

முதலில் விளையாடிய ஸ்ரீராமகிருஷ்ணா கலை அறிவியல் கல்லூரி அணி, அதிரடியாக விளையாடி 25 ஓவரில், ஆறு விக்கெட் இழப்புக்கு, 322 ரன்களை குவித்தது. அணியில் சிறப்பாக விளையாடிய முகமது ஆசிக் என்ற விளையாட்டு வீரர் 228 ரன் எடுத்தார். 

இதனை வெற்றி கொள்ள களமிறங்கிய ஜி.ஆர்.டி., கல்லூரி அணி, 21.2 ஓவரில், அனைத்து விக்கெட் இழப்புக்கு, 125 ரன் மட்டுமே எடுத்தது. 197 ரன் வித்தியாசத்தில் ஸ்ரீராமகிருஷ்ணா கலை அறிவியல் கல்லூரி அணியிடம் ஜி.ஆர்.டி., கல்லூரி அணி தோல்வியை சந்தித்தது. 

இதை போலவே, எஸ்.வி.எஸ் பொறியியல் கல்லூரி அணிக்கும், ஸ்ரீ ஜெயேந்திர சரஸ்வதி மகா வித்யாலயா கலை மற்றும் அறிவியல் கல்லூரி அணிக்கு இடையில் நடந்த கடுமையான போட்டியில் ஸ்ரீ ஜெயேந்திர சரஸ்வதி மகா வித்யாலயா அணி 22.5 ஓவரில் 122 ரன் மற்றும் 8 விக்கெட் இழப்புக்கு வெற்றி வாகை சூடியது.