நடிகை அதுல்யா ரவி வீட்டில் திருட்டு - வேலைக்காரப் பெண் உட்பட இருவர் கைது

Coimbatore: கோவை வடவள்ளி மருதம் சாலையில் வசிக்கும் நடிகை அதுல்யா ரவியின் வீட்டில் நடந்த திருட்டு சம்பவத்தில் வேலைக்காரப் பெண் உட்பட இருவர் கைது செய்யப்பட்டுள்ளனர்.

2017ஆம் ஆண்டு 'காதல் கண் கட்டுதே' திரைப்படம் மூலம் அறிமுகமான அதுல்யா ரவி, தற்போது பிரபல நடிகையாக உள்ளார். அவர் தனது தாயார் விஜயலட்சுமியுடன் கோவை வடவள்ளி மருதம் சாலையில் உள்ள வீட்டில் வசித்து வருகிறார்.

சில தினங்களுக்கு முன்பு அதுல்யா ரவியின் வீட்டில் இருந்த பாஸ்போர்ட் மற்றும் ரூ.2,000 பணம் காணாமல் போனது. இது குறித்து விஜயலட்சுமி வடவள்ளி காவல் நிலையத்தில் புகார் அளித்தார்.

காவல்துறையினர் விசாரணை நடத்திய போது, வீட்டில் வேலை செய்யும் தொண்டாமுத்தூர் குளத்துபாளையத்தைச் சேர்ந்த செல்வி (46) மீது சந்தேகம் ஏற்பட்டது. அவரிடம் நடத்திய விசாரணையில், அவர் தனது தோழி சுபாஷினி (40) உடன் சேர்ந்து திருட்டில் ஈடுபட்டது தெரிய வந்தது.

இதையடுத்து, செல்வி மற்றும் சுபாஷினி ஆகிய இருவரையும் காவல்துறையினர் கைது செய்தனர். மேலும், அவர்களிடமிருந்து ரூ.1,500 பறிமுதல் செய்யப்பட்டது. இந்த சம்பவம் உள்ளூர் மக்களிடையே பரபரப்பை ஏற்படுத்தியுள்ளது.