கோவை தீத்திபாளையத்தில் 150 அடி ஆழ கிணற்றில் விழுந்த புள்ளி மான் மீட்பு

Coimbatore: கோவை தீத்திபாளையத்தில் 150 அடி ஆழமுள்ள கிணற்றில் தவறி விழுந்த புள்ளிமானை வனத்துறையினர் தீயணைப்புத் துறையினரின் உதவியுடன் மீட்டனர். மீட்கப்பட்ட மானுக்கு மருத்துவ சிகிச்சை அளித்த பின்னர் அடர்ந்த காட்டுக்குள் விடுவிக்கப்பட்டது.

கோவை புறநகர் வனப்பகுதியை ஒட்டிய செம்மேடு, தீத்திபாளையம் ஆகிய பகுதிகளில் அவ்வப்போது யானைகள், மான்கள் போன்ற வனவிலங்குகள் உணவுக்காகவும், நீருக்காகவும் ஊருக்குள் வந்து செல்வது வழக்கம். இந்நிலையில், தீத்திபாளையத்தில் உள்ள 150 அடி ஆழமுள்ள கிணற்றில் ஒரு புள்ளிமான் தவறி விழுந்து தத்தளிப்பதாக அப்பகுதி மக்கள் வனத்துறையினருக்கு தகவல் அளித்தனர்.



இந்த தகவலின் பேரில் விரைந்து வந்த வனத்துறையினர், தீயணைப்புத் துறையினரின் உதவியுடன் கிணற்றில் இறங்கி புள்ளிமானை பாதுகாப்பாக மீட்டனர். மீட்கப்பட்ட மானுக்கு உடனடியாக மருத்துவ சிகிச்சை அளிக்கப்பட்டது. அதன் பின்னர், மான் முழுமையாக குணமடைந்ததை உறுதி செய்த பிறகு, அதனை அடர்ந்த காட்டுப் பகுதிக்குள் வனத்துறையினர் விடுவித்தனர். இந்த மீட்பு நடவடிக்கையில் வனத்துறையினரும், தீயணைப்புத் துறையினரும் இணைந்து செயல்பட்டதால், மானின் உயிர் காப்பாற்றப்பட்டது குறிப்பிடத்தக்கது.