கோவை ஒண்டிபுதூரில் தண்ணீர் தொட்டியில் தாய், இரண்டு மகள்கள் சடலமாக மீட்பு - போலீஸ் விசாரணை

Coimbatore: கோவை சிங்காநல்லூர், ஒண்டிபுதூர், நெசவாளர் காலனியில் தண்ணீர் தொட்டியில் தாயும் இரண்டு மகள்களும் சடலமாக மீட்கப்பட்ட சம்பவம் அதிர்ச்சியை ஏற்படுத்தியுள்ளது. சிங்காநல்லூர் போலீசார் விசாரணை மேற்கொண்டு வருகின்றனர்.

இச்சம்பவம் குறித்த விவரம்: கட்டிட தொழிலாளியான தங்கராஜ் (40), அவரது மனைவி புஷ்பா (28), மகள்கள் ஹரிணி (9) மற்றும் ஷிவானி (3) ஆகியோர் நெசவாளர் காலனியில் வசித்து வந்தனர். தங்கராஜ் அடிக்கடி குடித்துவிட்டு வந்து மனைவியுடன் சண்டையிடுவது வழக்கமாக இருந்தது.

ஜூலை 7 அன்று மாலை, தங்கராஜ் குடிபோதையில் வீட்டிற்கு வந்ததை அடுத்து இருவருக்கும் இடையே கடுமையான வாக்குவாதம் ஏற்பட்டது. மறுநாள் காலை வரை புஷ்பாவும் குழந்தைகளும் வெளியே வராததால் அக்கம்பக்கத்தினர் சந்தேகமடைந்தனர். தங்கராஜ் முரணான பதில்களை அளித்ததால், அவர்கள் உடனடியாக போலீசாருக்கு தகவல் தெரிவித்தனர்.

சம்பவ இடத்திற்கு விரைந்து வந்த போலீசார், வீட்டின் தண்ணீர் தொட்டியில் புஷ்பா மற்றும் அவரது இரண்டு மகள்களின் உடல்களை மீட்டனர். உடல்கள் பிரேத பரிசோதனைக்காக கோவை இ.எஸ்.ஐ. மருத்துவமனைக்கு அனுப்பப்பட்டன.

தங்கராஜிடம் போலீசார் விசாரணை மேற்கொண்டு வருகின்றனர். இந்த சம்பவம் தற்கொலையா அல்லது கொலையா என்பது குறித்து பல்வேறு கோணங்களில் விசாரணை நடத்தப்பட்டு வருகிறது. குடும்ப பிரச்சினையே இந்த சோகத்திற்கு காரணமாக இருக்கலாம் என சந்தேகிக்கப்படுகிறது.

சிங்காநல்லூர் போலீசார் வழக்குப் பதிவு செய்து, மேலும் விசாரணை நடத்தி வருகின்றனர். இச்சம்பவம் உள்ளூர் மக்களிடையே பெரும் அதிர்ச்சியையும் வருத்தத்தையும் ஏற்படுத்தியுள்ளது.