கோவை வ.உ.சி மைதானத்தில் நடைபெறும் அரசுப் பொருட்காட்சி இரண்டு நாட்கள் நீட்டிப்பு

கோவை: கோவை மாவட்ட ஆட்சியர் கிராந்தி குமார் பாடி வெளியிட்டுள்ள அறிக்கையில், வ.உ.சி மைதானத்தில் நடைபெற்று வரும் அரசுப் பொருட்காட்சி மேலும் இரண்டு நாட்கள் நீட்டிக்கப்பட்டுள்ளதாக தெரிவித்துள்ளார்.

கடந்த மே 25 அன்று தொடங்கிய இப்பொருட்காட்சி, ஜூலை 12 வரை 45 நாட்கள் நடைபெற திட்டமிடப்பட்டிருந்தது. தற்போது, பொதுமக்களின் ஆர்வத்தைக் கருத்தில் கொண்டு, ஜூலை 13 மற்றும் 14 ஆகிய இரண்டு நாட்கள் கூடுதலாக நீட்டிக்கப்பட்டுள்ளது.

இப்பொருட்காட்சியில் 27 அரசுத்துறை அரங்குகளும், 7 அரசு சார்பு நிறுவனங்களின் அரங்குகளும் என மொத்தம் 34 அரங்குகள் அமைக்கப்பட்டுள்ளன. இவற்றில் அரசின் நலத்திட்டங்கள் மற்றும் செயல்பாடுகள் குறித்த விவரங்கள் காட்சிப்படுத்தப்பட்டுள்ளன. மேலும், பொழுதுபோக்கு அம்சங்களும் இடம்பெற்றுள்ளன.

மே 29 முதல் நுழைவுக் கட்டணம் வசூலிக்கப்பட்டு வருகிறது. பெரியவர்களுக்கு ரூ.15, சிறியவர்களுக்கு ரூ.10 என்ற விகிதத்தில் கட்டணம் நிர்ணயிக்கப்பட்டுள்ளது. ஜூலை 10 வரை 43 நாட்களில், 1,30,615 பெரியவர்களும், 29,433 சிறியவர்களும் என மொத்தம் 1,60,048 பேர் பொருட்காட்சியைப் பார்வையிட்டுள்ளனர். இதன் மூலம் ரூ.22,53,555 அரசுக்கு வருவாயாக கிடைத்துள்ளது.

தினமும் ஆயிரக்கணக்கான மக்கள் பொருட்காட்சியைக் காண வருகின்றனர். இந்த அதிக வருகையைக் கருத்தில் கொண்டே, விடுமுறை நாட்களான சனி மற்றும் ஞாயிற்றுக்கிழமைகளில் கூடுதலாக இரண்டு நாட்கள் நீட்டிக்கப்பட்டுள்ளதாக மாவட்ட ஆட்சியர் கிராந்தி குமார் பாடி தெரிவித்துள்ளார். இப்பொருட்காட்சி ஜூலை 14 அன்றுடன் நிறைவடையும் என்றும் அவர் கூறினார்.