கோவையின் புதிய மாஸ்டர் பிளான் 2025 ஜனவரியில் தயாராகும்

Coimbatore: கோவை மாநகரின் புதிய மாஸ்டர் பிளான் 2025 ஜனவரியில் தயாராகும் என தகவல்கள் வெளியாகியுள்ளன. கோவை மாநகரின் கடைசி மாஸ்டர் பிளான் 1994ல் புதுப்பிக்கப்பட்டது. 2041 ஆம் ஆண்டில் கோவை மாநகரின் மக்கள் தொகை 45 லட்சமாக உயரும் என கணிக்கப்பட்டுள்ளது.

இதனால், எதிர்காலத் தேவைகளை கருத்தில் கொண்டு புதிய மாஸ்டர் பிளான் தேவை என்ற கோரிக்கை தொழில்துறை, சமூக மற்றும் இயற்கை ஆர்வலர்கள், பொதுமக்கள் தரப்பில் முன்வைக்கப்பட்டது. இதையடுத்து, பல்வேறு அரசுத் துறைகள் கோவை மாநகராட்சியுடன் இணைந்து வரைவு மாஸ்டர் பிளானை உருவாக்கின.

இந்த வரைவு 2023 அக்டோபரில் தமிழக அரசுக்கு அனுப்பப்பட்டது. அரசின் ஒப்புதலுக்குப் பிறகு, 2024 பிப்ரவரி 11 அன்று இந்த வரைவு அறிக்கை https://coimbatorelapa.com/ இணையதளத்தில் வெளியிடப்பட்டது. பொதுமக்களின் கருத்துக்களை பெற மே 15, 2024 வரை அவகாசம் வழங்கப்பட்டது.

தற்போது இந்த வரைவு மாஸ்டர் பிளான் மீது 3000 பொது கருத்துக்கள் மற்றும் ஆட்சேபனைகள் வந்துள்ளன. இவற்றை ஆராய்ந்து முடிக்க இரண்டு மாதங்கள் ஆகும். பின்னர், திருத்தப்பட்ட அறிக்கை தயாரிக்கப்பட்டு, தமிழக அரசின் நகர் ஊரமைப்பு இயக்ககத்திற்கு அனுப்பப்படும்.

அதிகாரிகள் இந்த அறிக்கையை ஆய்வு செய்து உறுதி செய்த பிறகு இறுதி வடிவம் பெறும். இந்த அனைத்து பணிகளும் முடிவடைய 2025 ஜனவரி வரை ஆகும் என எதிர்பார்க்கப்படுகிறது.