பொள்ளாச்சியில் மாநில அளவிலான கராத்தே போட்டி: 200க்கும் மேற்பட்ட மாணவர்கள் பங்கேற்பு

Coimbatore: பொள்ளாச்சியில் இன்டர்நேஷனல் சிண்டோ கான் கராத்தே பயிற்சி பள்ளி சார்பில் மாநில அளவிலான கராத்தே போட்டி நடைபெற்றது. இப்போட்டி பொள்ளாச்சி-பல்லடம் சாலையில் உள்ள தனியார் மண்டபத்தில் நடத்தப்பட்டது.

இப்போட்டியில் திண்டுக்கல், திருச்சி, கோவை, திருப்பூர் உள்ளிட்ட பல்வேறு மாவட்டங்களைச் சேர்ந்த 200க்கும் மேற்பட்ட மாணவ, மாணவிகள் பங்கேற்றனர்.



ஜூனியர், சப் ஜூனியர், சீனியர், சூப்பர் சீனியர் என்ற வயது மற்றும் எடை பிரிவுகளின் அடிப்படையில் போட்டிகள் நடத்தப்பட்டன.

கட்டா, குமிட்டே, டீம் கட்டா ஆகிய மூன்று செயல்முறைகளில் மாணவ, மாணவிகள் தங்களது திறமைகளை வெளிப்படுத்தினர். போட்டியின் முடிவில், வெற்றி பெற்ற மாணவ, மாணவிகளுக்கு பரிசுக் கோப்பைகள் மற்றும் சான்றிதழ்கள் வழங்கப்பட்டன.

இப்போட்டியில் முதல் மற்றும் இரண்டாம் பரிசு பெற்ற மாணவ, மாணவிகள் தேசிய அளவில் நடைபெறும் கராத்தே போட்டியில் பங்கேற்க தகுதி பெற்றுள்ளனர். மேலும், 2025 ஆம் ஆண்டு ஜூன் 17 ஆம் தேதி பொள்ளாச்சியில் உலக கராத்தே போட்டி நடத்த அனுமதி வழங்கப்பட்டுள்ளது.

இந்த உலகப் போட்டியில் 2000 வீரர், வீராங்கனைகள் பங்கேற்பார்கள் என எதிர்பார்க்கப்படுகிறது. இது பொள்ளாச்சி பகுதிக்கு பெருமை சேர்க்கும் என இந்திய கராத்தே தலைமை பயிற்சியாளர் பஞ்சலிங்கம் தெரிவித்தார்.