கோவை செல்வபுரத்தில் வியாபாரியை தாக்கி பணம் பறித்த மூவர் கைது

Coimbatore: கோவை செல்வபுரம் பகுதியில் தள்ளுவண்டியில் தின்பண்டங்கள் விற்பனை செய்யும் வியாபாரியை தாக்கி பணம் பறித்த மூன்று நபர்கள் போலீசாரால் கைது செய்யப்பட்டனர்.

செல்வபுரம் பேரூர் மெயின் ரோட்டை சேர்ந்த முகமது கரீம் (55) என்பவர் தள்ளுவண்டியில் தின்பண்டங்கள் வியாபாரம் செய்து வருகிறார். கடந்த ஜூலை 27 அன்று செல்வபுரம் இந்திராநகர் செல்வ விநாயகர் கோயில் அருகே வியாபாரம் செய்து கொண்டிருந்தபோது, அங்கு வந்த மூன்று நபர்கள் அவரிடம் ரூ.1000 கேட்டு கத்தி முனையில் மிரட்டினர்.

முகமது கரீம் பணம் கொடுக்க மறுத்ததால், அந்த மூவரும் ஆத்திரமடைந்து தகாத வார்த்தைகளால் பேசி அவரை தாக்கினர். பின்னர் அவரிடமிருந்த ரூ.500-ஐ பறித்துக் கொண்டு தப்பி சென்றனர்.

இந்த சம்பவம் குறித்து முகமது கரீம் செல்வபுரம் காவல் நிலையத்தில் புகார் அளித்தார். புகாரின் அடிப்படையில் விசாரணை மேற்கொண்ட போலீசார், சம்பவத்தில் ஈடுபட்டவர்கள் தெலுங்குபாளையம் உடையார் தெருவை சேர்ந்த கார்த்திகை செல்வம் (27), செல்வபுரம் வடக்கு ஹவுசிங் யூனிட்டை சேர்ந்த அர்ஜூன் (23), கல்லா மேடு தெற்கு ஹவுசிங் யூனிட்டை சேர்ந்த பிரகாஷ் (24) ஆகியோர் என கண்டறிந்தனர்.

இதையடுத்து, மூன்று பேரையும் போலீசார் கைது செய்தனர். அவர்களிடமிருந்து ஒரு கத்தி மற்றும் மூன்று செல்போன்கள் பறிமுதல் செய்யப்பட்டன. மேலும் விசாரணை நடைபெற்று வருகிறது.