விநாயகர் சதுர்த்தி: கோவை வடக்கு மாவட்ட திமுக சிறுபான்மை அணி சார்பில் 500 பேருக்கு அன்னதானம்

Coimbatore: விநாயகர் சதுர்த்தியை முன்னிட்டு கோவை வடக்கு மாவட்ட திமுக சிறுபான்மை அணி சார்பாக 500க்கும் மேற்பட்டவர்களுக்கு அன்னதானம் வழங்கப்பட்டது.

கோவை வடக்கு மாவட்ட திமுக செயலாளர் தொ.அ.ரவி அவர்களின் வழிகாட்டுதலின்படி, கலைஞர் நூற்றாண்டு நிறைவு விழாவை முன்னிட்டு 100 கோவில்களில் அன்னதானம் வழங்கும் திட்டத்தின் ஒரு பகுதியாக இந்த நிகழ்வு நடைபெற்றது. கோவை வடக்கு மாவட்டம் கவுண்டம்பாளையம் தொகுதியில் உள்ள சர்க்கார் சாமகுளம் பேரூராட்சி குரும்பபாளையம் வையாபுரி நகரில் அமைந்துள்ள ஸ்ரீ சக்தி கணபதி விநாயகர் திருக்கோயிலில் இந்த அன்னதான நிகழ்வு நடைபெற்றது.

இந்த நிகழ்வு குறித்து கோவை வடக்கு மாவட்ட திமுக சிறுபான்மை அணி தலைவர் ஆரோக்கிய ஜான் பேசுகையில், "தமிழின தலைவர், திமுக தலைவர் முன்னாள் முதல்வர் டாக்டர் கலைஞர் அவர்களின் நூற்றாண்டு நினைவு விழாவை முன்னிட்டு, 100 கோவில்களுக்கு கோவை வடக்கு மாவட்ட திமுக சிறுபான்மை அணி சார்பில் அன்னதானம் வழங்க திட்டமிடப்பட்டது. கோவை வடக்கு மாவட்ட திமுக செயலாளர் தொ.அ.ரவி அவர்களின் வழிகாட்டுதலின்படி கோவை வடக்கு மாவட்டத்திற்கு உட்பட்ட கோவில்களுக்கு அன்னதானம் வழங்கி வருகின்றோம்" என்றார்.

மேலும் அவர், "இதன் தொடர்ச்சியாக விநாயகர் சதுர்த்தி தினத்தை முன்னிட்டு இன்று எஸ்.எஸ் குளம் ஒன்றியத்திற்கு உட்பட்ட வையாபுரி நகரில் உள்ள சக்தி கணபதி விநாயகர் திருக்கோயிலுக்கு வருகை தரும் பக்தர்களுக்கு அன்னதானம் வழங்கப்பட்டது" என்று தெரிவித்தார்.

இந்த அன்னதான நிகழ்வின் மூலம் விநாயகர் சதுர்த்தி விழாவை கொண்டாடும் பக்தர்களுக்கு உணவு வழங்கப்பட்டதோடு, கட்சியின் சமூக சேவை நடவடிக்கைகளும் மேற்கொள்ளப்பட்டன.