கோவையில் 'மக்களைத்தேடி மாநகராட்சி' சிறப்பு முகாம் துவக்கம்

Coimbatore: கோயம்புத்தூர் மாநகராட்சிக்குட்பட்ட கிழக்கு மண்டலத்தில், "மக்களைத்தேடி மாநகராட்சி" என்ற சிறப்பு முகாமினை மேயர் கா.ரங்கநாயகி ராமச்சந்திரன் துவக்கி வைத்தார். இந்த நிகழ்வு காமராஜர் சாலையில் உள்ள மணிமஹால் திருமண மண்டபத்தில் நடைபெற்றது.

மாநகராட்சி ஆணையாளர் M. சிவகுரு பிரபாகரன் IAS முன்னிலையில் இந்த முகாம் தொடங்கப்பட்டது. தமிழக முதலமைச்சரின் வழிகாட்டுதலின்படி, கோவை மாநகராட்சிக்குட்பட்ட பகுதிகளில் பொதுமக்கள் பயன்பெறும் வகையில் பல்வேறு திட்டப்பணிகள் மேற்கொள்ளப்பட்டு வருகின்றன.



இந்த சிறப்பு முகாமில் வருவாய் பிரிவு, பொறியியல் பிரிவு, பொது சுகாதாரப் பிரிவு மற்றும் நகரமைப்புப் பிரிவு சார்பில் பல்வேறு சேவைகள் வழங்கப்படுகின்றன. இதில் சொத்துவரி மாற்றம், குடிநீர் இணைப்பு, பிறப்பு-இறப்பு சான்றிதழ், கட்டிட அனுமதி போன்ற சேவைகள் அடங்கும்.



இந்த முகாம் 15 நாட்களுக்கு ஒருமுறை ஒரு மண்டலம் என ஐந்து மண்டலங்களிலும் நடைபெறும். பொதுமக்கள் இந்த வாய்ப்பைப் பயன்படுத்தி மாநகராட்சியின் சேவைகளைப் பெற்று பயனடையுமாறு கேட்டுக்கொள்ளப்பட்டுள்ளனர்.



முகாமின் முதல் நாளிலேயே பல்வேறு கோரிக்கை மனுக்கள் பெறப்பட்டன. பெறப்பட்ட மனுக்களுக்கு உடனடியாக தீர்வு காணப்பட்டு ஆணைகளும் வழங்கப்பட்டன. இந்த முயற்சி மாநகராட்சியின் சேவைகளை மக்களுக்கு நெருக்கமாக கொண்டு செல்வதை நோக்கமாகக் கொண்டுள்ளது.