'வாரிசு அரசியலையும் ஊழல் அரசியலையும் தாங்க இதயத்தை பலமாக வைத்திருக்க வேண்டும்' - வானதி சீனிவாசன்

Coimbatore: உலக இருதய தினத்தை முன்னிட்டு கோவை ரேஸ்கோர்ஸ் பகுதியில் தனியார் மருத்துவமனை சார்பில் இருதய விழிப்புணர்வு நடைபயணம் நிகழ்ச்சி நடைபெற்றது. இந்நிகழ்ச்சியில் சிறப்பு விருந்தினராக பங்கேற்ற கோவை தெற்கு சட்டமன்ற உறுப்பினர் வானதி சீனிவாசன் செய்தியாளர்களை சந்தித்தார்.

இந்த சந்திப்பின் போது வானதி சீனிவாசன் கூறுகையில், "தமிழ்நாடு அரசியலில் இன்று நடக்கும் வாரிசு அரசியலையும் ஊழல் அரசியலையும் தாங்க வேண்டும் என்றால் இதயத்தை பலமாக வைத்திருக்க வேண்டும் என்பதால் இதயத்துக்காக இந்த நிகழ்ச்சியில் கலந்து இருக்கிறேன்" என்று தெரிவித்தார்.

மேலும், துணை முதலமைச்சராக உதயநிதி ஸ்டாலின் பொறுப்பேற்க உள்ளது தொடர்பான கேள்விக்கு பதிலளித்த வானதி சீனிவாசன், "இதயத்தை பலப்படுத்தி விட்டு வருகிறேன்" எனக் கூறி விடைபெற்றார்.

இந்த நிகழ்வில் வானதி சீனிவாசன் கூறிய கருத்துக்கள் தமிழக அரசியல் வட்டாரங்களில் பரபரப்பை ஏற்படுத்தியுள்ளது. வாரிசு அரசியல் மற்றும் ஊழல் குறித்த அவரது கருத்துக்கள் ஆளும் கட்சியை குறிவைத்ததாக அரசியல் நோக்கர்கள் கருதுகின்றனர்.