சூலூரில் 14 கிலோ கஞ்சாவுடன் இருவர் கைது: வாகனங்கள் பறிமுதல்

கோவை: சூலூர் காவல் நிலைய எல்லைக்குட்பட்ட பகுதியில் கஞ்சா விற்பனை செய்யப்படுவதாக ரகசிய தகவல் கிடைத்தது. இதையடுத்து, அக்டோபர் 7 ஆம் தேதி சூலூர் காவல் நிலைய தனிப்படை போலீசார் முத்துகவுண்டன்புதூர் அருகே சோதனை நடத்தினர்.

சோதனையின் போது, கஞ்சாவை விற்பனைக்காக கொண்டு வந்த இரண்டு நபர்கள் கைது செய்யப்பட்டனர். கைதான நபர்கள் தேனி மாவட்டத்தைச் சேர்ந்த செல்வம் (45) மற்றும் கேரளாவைச் சேர்ந்த பிரதீப் (45) என அடையாளம் காணப்பட்டனர்.

கைதான நபர்களிடமிருந்து ரூ.1,40,000 மதிப்புள்ள 14 கிலோ கஞ்சா பறிமுதல் செய்யப்பட்டது. மேலும், அவர்கள் பயன்படுத்திய ஒரு இருசக்கர வாகனம் மற்றும் ஒரு நான்கு சக்கர வாகனமும் பறிமுதல் செய்யப்பட்டன.

கைது செய்யப்பட்ட இருவரும் நீதிமன்றத்தில் ஆஜர்படுத்தப்பட்டு, பின்னர் சிறையில் அடைக்கப்பட்டனர். இந்த சம்பவம் குறித்து சூலூர் காவல் நிலையத்தில் வழக்குப் பதிவு செய்யப்பட்டு, மேல்விசாரணை நடைபெற்று வருகிறது.