கோவை மாவட்ட அணைகளில் நீர்மட்டம் உயர்வு

Coimbatore: கோவை மாவட்டத்தில் உள்ள முக்கிய அணைகளில் தென்மேற்கு பருவமழையால் நீர்மட்டம் படிப்படியாக உயர்ந்து வருகிறது. ஆனைமலை, பொள்ளாச்சி, வால்பாறை பகுதிகளில் உள்ள அணைகளுக்கு தொடர்ந்து நீர்வரத்து அதிகரித்து வருவதால் விவசாயிகளுக்கு நம்பிக்கை ஏற்பட்டுள்ளது.




ஆனைமலையை அடுத்த ஆழியாறு அணையின் முழு கொள்ளளவு 120 அடி ஆகும். நீர்ப்பிடிப்பு பகுதிகளில் பெய்த மழை நீரால், ஜூலை 21ஆம் தேதி நிலவரப்படி அணையின் நீர்மட்டம் 56.4 அடியாக உள்ளது. தற்போது அணைக்கு வினாடிக்கு 288 கன அடி நீர்வரத்து பதிவாகி வருகிறது. அணையில் இருந்து வினாடிக்கு 350 கன அடி நீர் வெளியேற்றப்பட்டு வருகிறது.




பொள்ளாச்சி அருகே அமைந்துள்ள பரம்பிக்குளம் அணையின் முழு கொள்ளளவு 72 அடி ஆகும். தென்மேற்கு பருவமழை காரணமாக நீர்ப்பிடிப்பு பகுதிகளில் இருந்து தொடர்ந்து நீர் வந்து கொண்டிருப்பதால், ஜூலை 21ஆம் தேதி நிலவரப்படி அணையின் நீர்மட்டம் 20.38 அடியாக உயர்ந்துள்ளது. இந்த அணைக்கு மூன்று அணைகளில் அதிக நீர்வரத்து பதிவாகி வருகிறது. வினாடிக்கு 1236 கன அடி நீர் வருவதாக பதிவாகியுள்ளது. அணையில் இருந்து வினாடிக்கு 910 கன அடி நீர் வெளியேற்றப்பட்டு வருகிறது.




வால்பாறை பகுதியில் உள்ள சோலையாறு அணையின் முழு கொள்ளளவு 160 அடி ஆகும். நீர்ப்பிடிப்பு பகுதிகளில் பெய்த மழை நீரால், ஜூலை 21ஆம் தேதி நிலவரப்படி அணையின் நீர்மட்டம் 86.76 அடியாக உள்ளது. அணைக்கு வினாடிக்கு 416 கன அடி நீர்வரத்து பதிவாகி வருகிறது. மேலும், அணையில் இருந்து வினாடிக்கு 1357 கன அடி நீர் வெளியேற்றப்பட்டு வருவதாக நீர்வளத்துறை அதிகாரிகள் தெரிவித்துள்ளனர்.




தென்மேற்கு பருவமழை தொடர்ந்து பெய்து வருவதால், அணைகளின் நீர்மட்டம் மேலும் உயரும் என எதிர்பார்க்கப்படுகிறது. இதனால் விவசாய பாசன தேவைகளுக்கு போதுமான நீர் கிடைக்கும் என விவசாயிகள் நம்பிக்கை தெரிவித்துள்ளனர். நீர்வளத்துறை அதிகாரிகள் அணைகளின் நீர்மட்டத்தை தொடர்ந்து கண்காணித்து வருகின்றனர்.